Den Bibel, Inhoudende dat Oude ende Nieuwe Testament (Biestkensbijbel)

¶ Den .ij. Psalm.

1

⁺VVaerom^† rasen de Heydenen,^* ende de lieden spreken soo te vergheefs:

+ A vers 1

† Is hier, oproer maken.

* Act. 4.c.25. Psal. 71.a.10. 83.a.3.

2

De Coningen inden lande rechten hen op, ende de Heeren raetslaghen met malcanderen, Teghen den HEEre ende sinen ghesalfden.

3

Laet ons haer banden verschueren, ende haer zeelen van ons worpen.

4

Maer die inden Hemel woont,^* belachtse, ende de HEEre bespotse.

* Psal. 37.b.13. Prou. 1.c.26. Psal. 59.b.9. Sapi. 4.b.12.

5

Hy sal eens met hen spreken, in zijnder gramschap, ende met zijnder verbolghentheyt sal hijse verschricken.

6

^+† Maer ick heb mijnen Coninc ingeset, op mijnen heylighen berch Sion.

+ B vers 6

† Ezech. 37.c.22 Esaie. 32.a.1. Iere. 23.a.5. 33.c.15.

7

Ick wil van eene sulcke wijse prediken. Dat den HEERE tot my gheseyt heeft:^* Ghy zijt mijne sone, heden heb ick v^‡ ghewonnen.

* Hebr. 1.b.5. 5.b.5. Act. 13.d.33.

‡ Ghebaert.

8

Eyscht van my, so wil ick v de Heydenen tot een erffenisse gheuen, ende der werelt eynden, tot eenen eyghendom.

9

^† Ghy sultse met eenen ijseren Scepter in stucken slaen,^* ghelijck potten, sult ghijse te stucken smijten.

† Apoca. 2.d.27 19.c.15.

* Esa. 30.c.14

10

Soo laet v nv onderwijsen ghy Coningen, ende laet v^† tuchtigen ghy Richters op Aerden.

† Corrigeren.

11

Dient den HEEre met vreesen, ende verblijt v met beuen.

12

Cust den Sone, dat hy niet toornich en worde, ende ghy op den wech vergaet, Want zijn toornicheyt sal haest aenbarnen.^† Maer wel allen, die op hem betrouwen.

† Iere. 17.b.7 Psal. 25.a.3. 31.a.1. 34.a.9. 84 b.13. 118.a.8.