Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlij. Capittel.

1

⁺ENde Hiob antwoorde den HEEre, ende sprac:

+ A vers 1

2

Ick bekenne dat ghy alle dinck vermoecht,^† ende gheen ghedachte en is v verborghen.

† Esaie. 29.c.15. 1.Reg. 16.b.7 Eccle. 43.a.4 Hebr. 4.b.12. 4.esd. 16.f.55

3

Het is een onuersint man, die sinen raet meynt te verberghen. Daerom bekenne ick dat ick onwijselijc ghesproken heb, dat my te hooch is, ende ick niet en verstae.

4

So verhoort nv, laet my spreken. Ick wil v vraghen, Leert my.

5

Ick heb v metter ooren ghehoort, ende mijn ooghe siet v nv oock.

6

Daerom beschuldighe ick my, ende doe boete in stof ende Asschen.

7

Als nv de HEEre dese woorden met Hiob ghesproken hadde, sprack hy tot Eliphas van Theman:^† Mijn gramscap is verbolghen ouer v, ende ouer uwe twee vrienden: Want ghy en hebt niet recht van my ghesproken, ghelijck mijn knecht Hiob.

† Iob. 27.a.7.

8

^† Soo neemt nv seuen Ossen, ende seuen Rammen, ende gaet henen tot mijnen knecht Hiob, ende offert Brantoffer voor v. Ende laet mijnen knecht Hiob voor v bidden: Want ick wil hem aensien, dat ic v niet sien en late, hoe ghy sotheyt bedreuen hebt. Want ghy en hebt niet recht van my ghesproken, gelijc mijn knecht Hiob.

† Math. 5.

9

^+* Doen ghinghen Eliphas van Thema, Bildad van Suah, ende Sophar van Naema henen, ende deden, so hen de HEEre geseyt hadde.^† Ende de HEEre aensach Hiob.

+ B vers 9

* Iob. 2.c.11.

† Genes. 4.a.4

10

Ende de HEEre keerde de gheuanckenisse Hiobs, doen hy voor zijn vrienden badt. Ende de HEEre gaf Hiob^† dubbelt soo vele, als hy ghehadt hadde.

† Mat. 19.d.29. Luce. 18.c.30. Danie. 4.e.35

11

Ende alle zijn broeders, ende alle zijn susters, ende al die hem te voren kenden, quamen tot hem, ende aten met hem in zijn huys, ende keerden hen tot hem, ende troosten hem ouer alle dat^† ongheual, dat de HEEre ouer hem hadde laten comen. Ende een yeghelijck gaf hem eenen schoonen penninck, ende eenen gulden voorhoofs bant.

† Schade oft ongheluck.

12

^+† Ende de HEEre seghende Hiob daer nae meer, dan te voren, Also dat hy vercreech, veerthien duysent Schapen, ende ses duysent Kemelen, ende duysent Iock Runders, ende duysent Ezelen.

+ C vers 12

† Prou. 10.c.22. Eccle. 11.b.5. Iob. 1.a.3.

13

Ende creech seuen sonen, ende drie dochteren,

14

Ende hiet de eerste Iemima, de ander Kesia, ende de derde Kerenhapuch.

15

Ende daer en werden so schoone vrouwen niet gheuonden in alle de landen, als de dochteren Hiobs. Ende haer vader gaf hen erfdeel onder haren broederen.

16

Ende Hiob leefde daer nae hondert ende veertich iaer,^* dat hy sach kinderen, ende kints kinderen, tot in dat vierde lidt.

* Psal. 128.a.6. Gene. 50.d.22 Tob. 14.a.2.

17

Ende Hiob sterf, oudt ende des leuens sadt.

¶ Eynde des Boecx Hiobs.