Den Bibel, Inhoudende dat Oude ende Nieuwe Testament (Biestkensbijbel)

Dat Boeck Hiob.

¶ Dat eerste Capittel.

¶ Hiobs weluaert ende goeden staet wort hier beschreuen, ende daer by zijn ongheual, dwelc hem van Sathan wt der ghehengenisse Gods aenghedaen wort.

1

⁺DAer was een man inden Lande^† Vz, die hiete Hiob, Die selue was slecht ende recht, God vreesende, ende mijde dat quaet.

+ A vers 1

† Gene. 22.d.21.

2

Ende wan seuen sonen, ende drie dochteren.

3

Ende^† zijns vees was seuen duysent Schapen, drie duysent Kemelen, vijf hondert iock Ossen, ende vijf hondert Ezelinnen, ende seer veel gesins. Ende hy was heerlijcker dan alle die Oostwaerts woonden.

† Iob. 42.c.12.

4

Ende zijne sonen ghingen henen, ende hielden maeltijden, elc in zijnen huyse op zijnen dach. Ende seynden henen, ende nooden haer drye susteren, om met hen te eten ende te drincken.

5

Ende als eenen dach des welleuens om was, soo seynde Hiob henen ende heylichdese, ende maecte hem des smorghens vroech op, ende offerde Brantoffer na haerder alder getal. Want Hiob dachte: Mijn sonen mochten gesondicht, ende God^* ghesegent hebben in haren herten. Alsoo dede Hiob alle daghe.

* Ghelastert.

6

⁺Maer het^† geuiel op eenen dach, doen de kinderen Gods quamen, ende voor den HEEre traden, so quam de Sathan ooc onder hen.

+ B vers 6

† Iob. 2.a.1.

7

Maer de HEERE sprac tot Sathan: Van waer coemt ghy? Sathan antwoorde den HEEre ende sprack: Ick^† heb dat Lant rontom door ghetrocken.

† 2.Pet. 5.b.8.

8

De HEEre sprack tot Sathan: En hebdy gheen acht ghehat op mijnen knecht Hiob? Want zijns ghelijck en is inden Lande niet, slecht ende recht, God vreesende, ende schout dat quaet.

9

Sathan antwoorde den HEEre, ende sprac: Meynt ghy dat Hiob om niet God vreest?

10

Ghy hebt doch hem zijn huys, ende al wat hy heeft, rontsom bewaert. Ghy hebt dat werck zijnder handen gesegent, ende zijn goet heeft hem wtghebreyt inden Lande.

11

Maer steect v hant wt, ende tastet al aen wat hy heeft: Wat gheldet, hy sal v int aensicht^* seghenen?

* dat is, vloecken ende lasteren.

12

De HEEre sprack tot Sathan: Siet, al wat hi heeft, dat sy in uwer handt, sonder alleen aen hem seluen en slaet v handt niet. Doen ghinc Sathan wt vanden HEERE.

13

⁺Maer opten dach doen zijne sonen ende dochteren aten, ende droncken wijn in haers eersten gheboren broeders huys,

+ C vers 13

[p. 189v]

$

14

Soo quam een bode tot Hiob, ende sprack: De Ossen ploechden, ende de Ezelinnen ghinghen daer neffens in de weyde.

15

Doen vielen die wten Rijck van Arabien daer in, ende namense, ende sloegen de knapen metter scherpten des sweerts: Ende ick ben alleen ontloopen, dat ict v bootschappen soude.

16

Doen die noch sprac, quam een ander ende seyde:^† Dat vyer Godts viel vanden Hemel, ende verbernde beyde schapen ende knapen, ende verteerdese: Ende ic ben alleen ontcomen, dat ict v soude bootschappen.

† 4.Reg. 2.c.13.

17

Doen die noch sprac, quam daer een, ende seyde: De Chaldeen maecten drie spitsen, ende oueruielen de Kemelen, ende namense wech, ende sloeghen de knapen metter scherpten des sweerts: Ende ic ben alleen ontloopen dat ict v bootschappen soude.

18

Doen die noch sprac, quam daer een, ende seyde:^* Vwe sonen ende dochteren aten ende droncken, in haer eerste gheboren broeders huys.

* Iob. 8.a.4.

19

Ende siet, doen quam eenen grooten windt van ouer de woestijne, ende stiet op de vyer hoecken des huys, ende werpt op de Iongelingen datse storuen: Ende ick ben alleen ontcomen, dat ict v soude bootschappen.

20

Doen stont Hiob op, ende verschuerde zijn cleederen, ende schoer zijn hooft, ende viel op de Aerde, ende aenbat ende sprack:

21

Ic ben^† naect van mijnder moeder lichaem ghecomen, naect sal ick weder derwaerts varen.

† Eccle. 5.b.14. 1.Tim. 6.b.7. Iob. 27.c.19. Eccle. 11.b.10. Psal. 49.c.18.

22

De HEEre heuet ghegheuen, de HEERE heuet ghenomen. Den Naem des HEEren sy gelouet.

23

^† In allen desen en sondichde Hiob niet, ende en dede niet sottelijck teghen Godt.

† Iob. 2.b.10.