Den Bibel, Inhoudende dat Oude ende Nieuwe Testament (Biestkensbijbel)

¶ Dat xxiij. Capittel.

¶ Dauid bereyt ende beschict totter timmeragie des Tempels, hout ende steen, gout ende siluer.

1

⁺ ENde Dauid hiet de^† vreemdelingen vergaderen die int Lant Israels waren,

+ A vers 1

† 2.Par. 2.d.17.

2

Ende hy bestelde steenhouwers, om de steenen te houwen, om dat Huys Gods te timmeren.

3

Ende Dauid bereyde veel ijsers tot naghelen aen de dueren, in de poorten, ende watter te nagelen waer, ende so veel metaels dattet niet te wegen en was. Oock Cederen hout sonder getal.

4

Want die van Sidon ende Tyro, brachten veel Cederen houts tot Dauid.

5

Want Dauid dachte: Mijn sone Salomo is een Iongelinck ende teer. Maer dat huis, dat den HEEre ghetimmert sal worden, sal groot zijn, alsoo dat zijnen naem ende beroeminghe verheuen worde in allen Landen. Daerom wil ick hem voorraet^* beschicken. Alsoo beschickte Dauid veel voorraets voor zijn doot.

* bereyden, besorghen

6

⁺ Ende hy riep zijnen sone Salomo, ende

+ B vers 6

[p. 159v]

gheboot hem te timmeren dat huys des HEEren des Gods Israels.

7

Ende sprack tot hem: Mijn sone^* ick had inden sinne den Naem des HEEren mijns Gods een huys te timmeren.

* 2.Reg. 7.a.1. 1.Par. 29.a.3.

8

Maer dat woort des HEEren quam tot my, ende sprack:^† Ghy hebt vele bloets ghestort, ende groote oorloghen gheuoert. Daerom en sult ghi mijnen Naem gheen huys timmeren, om dat ghy soo veel bloets op de Aerde ghestort hebt voor my.

† 3.Reg. 5.a.3.

9

Siet, den sone die v gheboren sal worden, die sal een gherust man zijn. Want ick wil hem rusten laten van alle zijne vianden rontsomme. Want hy sal Salomo heeten. Want ick wil vrede ende ruste gheuen ouer Israel, zijn leuen lanc.

10

Die sal mijnen Naem een huys timmeren. Hy sal mijn sone zijn, ende ic wil zijn Vader zijn. Ende ick wil zijnen Coninclijcken stoel ouer Israel beuestighen eewelijck.

11

⁺ Dus sal nv mijn sone de HEEre met v zijn, ende sult gheluckich zijn, dat ghy den HEEre uwen Gode een huys timmert, so hy van v gheseyt heeft.

+ C vers 11

12

^† Ooc sal v de HEEre cloecheyt ende verstant gheuen, ende sal v Israel beuelen, dat ghi hout de Wet des HEEren ws Gods.

† 3.Reg. 3.b.12.

13

Maer dan suldy gheluckich zijn, als ghy v alsoo houdt, dat ghy doet na de geboden ende rechten,^* die de HEEre Mose gheboden heeft aen Israel.^† Sijt vrijmoedich, ende hebt eenen goeden moet, en vreest noch en verslaet v niet.

* Deut. 17.d.23.

† 3.Reg. 2.a.2.

14

Siet ic hebbe in mijnder armoeden bereyt totten huyse des HEEren, hondert duysent Centener gouts, ende duysentwerf duysent centener siluers, daer toe metaels ende ijsers sonder getal, want dies is te vele. Oock hebbe ick houten ende steenen beschict, dies muecht ghy noch meer maken.

15

Ende ghy hebt oock veel arbeyders, steenhouwers ende timmerlieden aen steen ende hout, ende alderhande wijse lieden op alderhande werck aen gout, siluer, metael ende ijser, sonder ghetal.

16

Dus maect v nv op, ende rechtet wt: De HEEre sal met v zijn.

17

⁺ Ende Dauid gheboot alle Ouersten Israels, dat sy zijnen sone Salomo souden helpen.

+ D vers 17

18

En is de HEEre uwe God niet met v? En heeft v rontsomme ruste gegeuen? Want hi heeft de inwoonders des Lants in uwen handen ghegeuen, ende dat Landt is onderbracht voor den HEEre, ende voor zijnen volcke.

19

Dus geeft nv uwe herten ende uwe sielen daer henen, dat ghy den HEEre uwen Godt soect, ende maect v op, ende timmert Gode den HEEre een Heylichdom, op datmen de Arcke des verbondts des HEEren, ende de heylighe vaten int huys brenge, dat den Naem des HEEren getimmert sal worden.

20

Also maecte Dauid zijnen sone Salomo tot eenen Coninck ouer Israel, doen hy oudt ende des leuens sadt was.