Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hoe dat Godt Noe segende ende sine Sonen, ende met hem een verbondt maecte, ende beuestichde den houwelijcken staet, trecht des wereltlijcken sweerts, ende den Reghenboghe tot een teecken des verbonts.

1

⁺ ENde Godt segende Noah ende zijn sonen, ende sprac: Sijt vruchtbaer, ende vermeerdert v, ende veruult de Aerde.

+ A vers 1

2

Vwe vreese ende verschricken sy^* ouer alle ghedierte op Aerden, ouer alle voghelen onder den Hemel, ende ouer al dat op den Aertbodem cruypt. Ende alle visschen in de See zijn in uwe handen ghegheuen.

* Genes. 1.d.28

3

Al wat hem roert ende leeft,^† dat si v spijse. Ghelijck dat groen cruyt, hebbe ict v al ghegheuen.

† Genes. 1.d.29.

4

^* Alleene en eet dat vleesch niet, dat noch leeft in zijnen bloede.

* Leuit. 7.c.26. 17.c.14.

5

Want ick wil oock ws lijfs bloet wreken,^‡ ende wilt aen allen dieren wreken. Ende wil des Menschen leuen wreken, aen eenen yegelijcken Mensche, als die zijn Broeder is.

‡ Exo. 21.c.28

6

^* Wie menschen bloet verghiet, diens bloet sal oock door Menschen vergoten worden,^† Want God heeft den Mensch tot zijnen Beelde ghemaeckt.

* Tren. 4.c.13. Mat. 26.e.51 Apoc. 13.b.10.

† Gen. 1.d.27.

7

Weest vruchtbaer ende vermeerdert v. Ende roert v opter Aerden, dat uwer vele daer op worden.

8

⁺ Voorts seyde Godt tot Noah, ende zijn Sonen met hem,

+ B vers 8

9

Siet,^* ick make met v een verbont, ende met uwen Sade, na v,

* Esai. 54.b.9.

10

Ende met alle leuende dieren by v, aen voghelen, aen vee, ende aen alle dieren op Aerden, by v, van al dat wter Arcken ghegaen is, welckerley dieren het zijn op Aerden.

11

Ende make mijn verbondt alsoo met v, dat nv voortaen niet meer alle vleesch verdoruen en sal worden metten water der Diluuien, ende daer en sal nv voortaen gheen Diluuie meer comen, die de Aerde verderue.

12

Ende Godt sprack: Dat is dat teecken des verbonts, dat ick ghemaect heb, tusschen my ende v, ende alle leuende dieren by v, nv voortaen eeuwelijcx.

13

^* Mijnen boghe heb ick gheset inden wolcken, die sal dat teecken zijn des verbonts, tusscen my ende der Aerden.

* Eccli. 43.b.12

14

Wanneert coemt dat ic wolcken ouer de Aerde voere, soo salmen mijnen boge sien inden wolcken,

15

⁺ Ende dan wil ick ghedencken aen mijn verbondt, tusschen my ende v, ende alle leuende dieren, in alderley vleesch. Dat nv voortaen niet meer eene Diluuie come, die alle vleesch verderue.

+ C vers 15

16

Daerom sal mijnen boghe inde wolcken zijn dat ick hem aensie, ende ghedencke aen dat eewighe verbondt, tusschen Godt ende alle leuende dieren, in allen vleessche, dat op Aerden is.

17

Dat selue seyde Godt oock tot Noah: Dit sy dat teecken des verbonts dat ick ghemaeckt heb, tusschen my ende allen vleessche op Aerden.

18

Die Sonen Noah die wter Arcken ghinghen, zijn dese: Sem, Ham, Iaphet. Maer Ham is de vader Canaan.

19

Dat zijn de drie Sonen Noah, van dien is alle dat Landt beseten.

20

^* Maer Noah begoste, ende werdt een ackerman, ende plante wijnberghen,

* Esaie. 5.a.1. Mat. 21.d.33.

21

Ende doen hy vanden wijn dranck, wert hy droncken, ende lach inder Hutten ontdeckt.

22

Als nv Ham Canaans Vader zijns Vaders schamelheyt sach, seyde hijt beyde sinen Broederen daer buyten.

23

⁺ Doe nam Sem ende Iaphet een cleedt, ende leyden dat op haerder beyder schouderen, ende ghinghen te rugghe daer toe, ende decten haers Vaders schamelheydt toe, ende haer aensicht was afghekeert, dat si haers Vaders schamelheyt niet en saghen.

+ D vers 23

24

Als nv Noah ontwaeckte van zijnen wijne, ende vernam wat hem zijn cleynste Soone ghedaen hadde,

25

Doen sprac hy: Veruloect sy Canaan, ende sy een knecht alder knechten, onder sinen broederen,

26

Ende sprack voorder: Ghelooft sy Godt de HEERE des Sems, ende Canaan sy zijn knecht.

27

Godt breyde Iaphet wt, ende late hem woonen inde Hutten Sems, ende Canaan sy zijn knecht.

28

Noah leefde na der Diluuien driehondert ende vijftich Iaer, dat zijn gheheel ouderdom wert neghenhondert ende vijftich Iaer, ende sterf.