Biekorf. Jaargang 46

De Watering van Veurne-Ambacht.
1411-1412.
(Vervolg van bl. 23).

Item up den 14ⁿ dach van weedemaend als men hovinres vermaecte, de heren ende de wet wesende up haren banc, vertert te Arnoud Nicools, present wesende de heren ende de vulle wet ende haerlieden familien metgaders diversche personen up hemlieden comende

20 lb.18 sc.

Item den zesten daghe van hoymaend als men de kerfbrekinghe helt up de bourch vander vors. hovine van 12. d. up tghemet, vertert te Aernoud Nicools biden heren ende bider ghemeenre wet met haerlieden familien

15 lb. 16 sc.

Item upden 26ⁿ dach van hoymaend, van heren ende de wet wesende up haren banc, ende enighe van den groten leeden, metgaders der meentucht aldoe wesende in de bourch, bi ere daghinghe van commune omme raed ende avis te hebbene, waer men delven zoude, ende drouch tavis dat men delven zoude beghinnende ten spriete buter Nieupoort, also upwaert gaende te Stapeldamme waerd, ende was aldoe ghesleghen 6. d. up tghemet, vertert aldoe te Aernoud Nicools by myn here van S. Niclaus, heren ende de vulle wet ende enighe ghelande in de vors. wateringhe met haerlieden familien

18 lb. 17 sc.

Item Dans Pauwels als ontfanghere van alden goede vander wateringhe, van beden hovinen tontfanghene van 12. d. Ende 6. d. up tghemet ende van svorseiden ontfancs te hayene ende den ontfanc der wateringhe goed te doene,

60 lb.

[p. 71]

Item omme den hovinc bouc, forchin, pappier, bin alden jare

4 lb.

Somme van desen 182 lb. 11 sc.

Andre costen ghedaen anden varschen dijc omme die te hoghene ende te versterkene daert van noden was.

Eerst zo was vorwoorde ghemaect biden regenten vander wateringhe, bi hemlieden wesende Andries de Visch ende Fransois Robaerd als cuerheers ende Willem van den Rine, landmeter, jeghen Heinric van Duustborch, meester spademan, den varsschen dijc te hoghene ende te sterkene te vier parchelen, dan of teerste parcheel beghinnende te Cuerbaerds houcke bewesten Pereboom brughe also oost gaende tote Willems van Oost stede boosten Knocke te hoghene bachten in zome steden 3. voeten, 2 1/2 voeten, 2 voete, ende voren onderhalven voet tenighen stede ende zom enighe steden, enen voet, de holen ende de lanken te vulne ende de laye voren te makene, boven 15. voete breed te houdene, ende dat omme 10. sc. de roede, te verneiderne met 12 d. de roede.

Dit parcheel lanc wesende dat ghemaect zoude wesen 531. roeden ende diet verneiderde, also menich werven als hijt dade met 12. d. up de roede, zoude hebben telken waerf vander wateringhe 4. lb.; twelke parcheel verneiderde Willem van den Rine 12 d. upde roede; item Heinryc filius Jans, meester spademan, int ghelike verneidert 12. d. up de roede, ende vort zo verneiderdet de vors. Heinric van Duustborch met 12. d. up de roede, ende dus bleeft staende up 7. sc. de roede, beloopt dit vors. parcheel ghemeiten de langhe ende bevonden bi Willem vanden Rine also boven verclarst.

185 lb. 17 sc.

Item van verneideringhe

12 lb.

Item tander percheel, dats te wetene van Willem van Oost stede tote der hogher brigghe bute Dixmude, indit percheel de varsche dijc in zome enighen steden ghehoghet bachten: vier voeten een half, vier voeten, drie ende een half voete, drie voete, twee ende een half voete, twee voeten, ende voren: 2. voeten ende te zomeghen steden eenen voet. Twelke nam Heinrijc van Duustbourch omme 11. sc. de roede, te verneiderne met 12. d. up de roede. Ende diet verneiderde met twaelf penninghen up de roede, also menich warven als hijt dade, zoude hebben vander wateringhe telker waerf vier ponden parisis. Ende het verneiderde tvors. percheel Willem vanden Rine twaelf penninghen upde roede; item Andries van Woumen met zinen medeghesellen verneiderdet met ghelike 12. d. up de roede. Ende voort zo verneiderdet dezelve

[p. 72]

Heinrijc van Duustborch met 12. d. up de roede. Ende dus zo bleeft staende up achte scellinghen par. de roede; beloopt dit vors. percheel ghemeiten ende bevonden bi Willem van den Rine, landmeter, lanc bider strecroede 424. roeden, belopen in ghelde

169 lb. 12 sc.

Item van verneideringhen

12 lb.

Item tarde percheel, vander hogher bricghe bute Dixmude, noord tote Jan s'Hamers damme, in dit percheel den varschen dijc bachten te hoghene 3. voeten, 2 1/2 voeten ende 2. voeten in zomighen steden, ende voren 2. voeten ende enen voet, ende nam Heinrijc van Duustbourch up 9. sc. de roede te verneiderne met 12. d. up de roede, ende diet verneiderde met 12. d. up de roede also menich warve als hijt dade, zoude hebben vander wateringhe telken waerf 4. lb. Ende het verneiderde Willem van den Rine 12. d. up de roede, item Andries van Women met zinen medeghesellen int ghelike 12. d. up de roede, ende vort zo verneidert de vors. Heinrijc met 12. d. up de roede, ende dus bleeft staende up 6. sc. de roede, beloopt dit vors. percheel ghemeten de langhe ende bevonden bi Willem van den Rine, bider strecroede 344 roeden, belopen in ghelde

103 lb. 4 sc.

Item van verneideringhen

12 lb.

Item tvierde percheel van Jans Hamers damme noord tote Jan Walloys stedekin, in dit percheel den varschen dijc bachten te hoghene in zome steden 3 1/2 voeten, 3. voeten, 2 1/2 voeten, ende voren 2. voeten ende enen voet, ende het nam de vors. Heinrijc van Duustbourch up 10. sc. de roede, te verneiderne met 12. sc. up de roede, ende diet verneiderde met 12. d. up de roede also menich waerf als hijt dade, zoude hebben telker waerf vander wateringhe 4 lb. Ende verneiderde tvors. percheel Willem van den Rine 12. sc. up de roede; item Jan van Omersvelde int ghelike met 12. d. up de roede ende vort zo verneiderdet Heinrijc van Duustbourch met 12. d. up de roede, ende dus bleeft staende up 7 sc. de roede, beloopt dit vors. percheel, ghemeten de langhe ende bevonden bider strecroede, bij Willem van den Rine, 690. roeden, comen in ghelde

241 lb. 10 sc.

Item van verneideringhen

12 lb.

(Vervolgt).