Biekorf. Jaargang 36

Tegen de plunderende soldaten en de vrijbuiters in het Ypersche.

UP den laetsten in Lauwe en de 9^en in Sporcle 1586, waeren by myn heeren bailliu ende schepenen beschreven, dedel vassalheeren ende de ghegoede ghezworen ende notable vande zelve Casselrie, omme te resolveren up de oirboyrlicste ende bequaemste middelen waermede men zoude moghen beletten ende te ghemoete commen, dexploicten die de vianden van Oosthende, Sluus, ende andere vrybuuters, vande upzittende vande zelve Casselrye daeghelicx by fortse ende ghewelde waeren extorquerende, oockmede het afdryven vande peerden ende koebeesten, allessins ter ruine van hemlieden, ende ten inestimable naedeele vande agriculture.

Ende ter zelver vergaederynghe, naer veele raemynghen ende ghehoort zynde al de reedenen die by diverssche diversschelick gheallegiert waeren, was gheresolveert, hoe eer hoe liever, zeker ghetal van volcke up

[p. 287]

te nemen onder de conduyte van eenen capitain, ter assistencie vanden Bailliu vander voorseyder zaele, die continuelick van prochie te prochie reysen ende metter assistencie vande landslieden, volghende den placate, volghen, vanghen ende dootslaen zouden, alle vianden, vrybuuters ende andere die zy bevynden zouden, de goede lieden ter onghelycken doende. Dat men de pennynghen daeran clevende, zoude ommestellen up de qualiteit vande landen ligghende onder dezelve Casselrye, weder de zelve ghecultiveert zyn ofte niet, ende dat ten upziene hierduere niet alleenelick de landen alsnu ghecultiveert zynde inde culture zouden moghen ghemaintineert zyn, maer ooc apparentelick duer zulck bevynden de gheoncultiveerde landen zouden moghen ter noote ghebrocht ende ghelabuert werden, wel verstaende nochtans dat de onghecultiveerde landen maer half zoo veele ghestelt zullen wesen als de benoote; ten welcken fyne ooc gheresolveert was, metten eersten requeste thove te presenteren omme octroy zo verre angaet de taxatie upde onghecultiveerde landen.

Staatsarchief Brugge, Kasselrij Yper, 1^e reeks, n^r 77, f^o24.