Bible in duytsche (Delftse bijbel 1477)

[1]

1

Aleph. § Hoe sittet allene die stat vol volcs Hoe is die vrouwe vanden heydenen geworden als een weduwe: ende die princen vanden prouincien hoe is si geworden onder tribuyt

2

Beth Wenende weende si in die nacht ende haer tranen sijn aen haer wanghen Niemant en is diese vertroest: van al haren lieuen vrienden. Alle haer vrienden hebbense veronwaert: ende sijn haer vianden geworden.

3

§ Gimel. § Juda is ouer gheuaren om dat vernoey ende om die menichte vanden dienst. Hi woende onder die heydenen: ende en vant gene rust. Alle haer quelrers hebbense gheuaen tusschen die verdrieten.

4

§ Deleth. § Die weghen van syon wenen: om dat si niet en sijn die ter feesten comen moghen. Alle haer poerten sijn ghedestrueert: haer priesteren sijn versuchtende Haer magheden sijn quelachtich: ende si is bedruct mit bitterheden.

5

§ He. Haer vianden sijn geworden int hoeft: ende haer vianden sijn rike gheworden. Want die here heuet op haer ghesproken: om die menichte van haerre quaetheden. Haer cleyne kinder sijn geleit in gheuanghenisse: voerden quelres aensichte.

6

§ Dau. § Vander dochter van syon is wtgegaen alle haer schoenheit. Haer princen sijn gheworden als

[p. *496]

weders die ne ghene weide en vinden: ende sijn wech ghegaen sonder starcheit voer des gheens die hem nauolghede

7

§ Zay. § Ende iherusalem is ghdacht der dagen haers vernoeys ende der ouerdadicheit al haerre begheerliker dinghen. dien si van ouden daghen ghehadt hadden: als haer volck viel in die viantlike hant: ende ne gheen helpere en was. Die vianden saghense: ende si bebespotten haer vierten.

8

§ Heth § Iherusalem heeft sonde ghesondicht: hier om is si onghestade gheworden. Alle diese verhienen si hebbense veronwaert want si hebben haer scaemte ghesien Si is versuchtende: ende achterwaert ghekeert.

9

§ Teth. § Haer smette sijn aen haer voeten: ende si en heeft niet gedacht haers eynden Si is anxtelijc neder gheset: ende en heeft ne ghenen vertroester. Here sich mijn vernoey: want mijn viant is op gherecht.

10

§ Joth. § Die viant stac sijn hant tot allen haren begheerliken gueden: want hi sach dat die heyden ingecomen waren in haer sanctuarie: daer du of beuolen hadtste dat si in dijne vergaderinghe niet comen en souden.

11

§ Kaph. § Al haer volc is versuchtende: ende sokende broot. Si gauen alle haer preciose dinghen om spise: om die ziele te vermaken. Besich here ende merct: dat ic snode geworden bin.

12

Lamech. § O gi alle di daer den wech lijt merct ende besiet: ofte rouwe is gheliken als mijnen rouwe. Wnat die here heeft mij gecastiet also hi ghesproken heuet: inden daghe der gramscap sijns toerns.

13

§ Mem. § Vanden hogen heeft hi vyer ghesendet in mijn beenren: ende heeft mij gheleert. Hi heuet een nette wtghespreit mijnen voeten: hi heeft mi achter waert ghekeert. Hi heeft mi bedroeft geset alle den dach mit droefheden becommert.

14

§ Nun §. Dat iuc van mijnen quaetheden heeft hi ghewaect in sijne hant:: si sijn te gader gewonden ende geleit op mijn hals. Mijn cracht is ghecranct: die here heeft mij ghegeuen in die hant daer ic of niet en sal moghen opstaen

15

§ Samech. § Die here heeft wt ghenomen van midden mi alle mijne grote lude: hi heeft den tijt ieghen mi gheropen: dat hi mijn wtuercoren vertreten soude. Die here heeft die perse ghetreden der maget der dochter van iuda.

16

§ Ayn § Hier om bin ic wenende ende mijn oghe bringhet water wt want die vertroestere die mijne ziele bekeert. is verre van mij gheworden Mijn kinderen sijn verloren worden: want die viant is te bouen geworden.

17

§ Phe. § Syon stac haer handen wt: ende nyemant en is diese vertroest. Die here heuet beuolen ieghen iacob: al omme ende omme sijn sine viande hem Ende iherusalem is onder hem gheworden als ofte si besmet waer niet vrouwen maet suueringe.

18

§ Sade. § Die here is gerecht: want hi heeft des heren mont te gramscap verporret. hoert bidde ic alle volc: ende siet mijn rouwe. Mijne magheden ende mijne ionghelinghen sijn wech ghegaen in gheuanghenisse

19

Coph. § Ic riep mijnen vrienden: ende sij bedroghen mi. Mijne priesteren ende mijne oude luden sijn in die poert ver-

[p. *497]

teert: want si sochten spise tot haerre behoef. om dat si hare zielen vermaken souden.

20

§ Res. § Besich here dat ic bin in vernoey: mijn huys is in verdriet. Ende mijn herte is ommeghekeert in mij seluen: want ic bin vol van bitterheden. Buyten verslaet dat zwaert: ende die doot is den huyse ghelike.

21

§ Syn. § Si hebben ghehoert want ic versuchte: ende dat nyemant en is die mi vertroesten mach.. Alle mijn vianden hebben mijn quaet ghehoert: si sijn verblijt want du heuest gedaen. Du hebste toegebracht den dach des vertroestens ende si sullen mi gelike worden

22

Thau. Alle haer quaet come in voer di: ende castijtse alsoestu mi gecastijt hebtste om alle mijne quaetheden: want mijne versuchten sijn vele: ende mijn herte is drouende.