Bible in duytsche (Delftse bijbel 1477)

[p. *339]

[1]

1[52:1]

ENde salomon buychde sijn knyen in teghenwoerdicheit alder vergaderinghe israhel ende opdede sijn handen totten hemel

2[52:2]

ende seide Heer god israhel gheen god en is di ghelijc bouen in den hemel noch beneden in der aerden

3[52:3]

die bewaerste dijn testament ende barmherticheit dijnen knechten gaende in dijnen aenschijn mit alre herten.

4[52:4]

houdendende dijnen knecht dauid welc du hem toegheseit hebtste ende ghesproken mit dijnen monde ende veruult hebtste mit dijnre hant als dese dach

5[52:5]

Ende nv heer god israhel bewaer dinen knecht dauid minen vader welc du hem beloeft hebste seggende. Niet en sal dij afwesen van mijnen aensichte een man sittende in den throon israhel.

6[52:6]

Ist sake dat dijn sonen bewaren mijn wet ende wanderen in mijn gheboden als ghewandert hebben die ghelouighe menschen in mijn aenschijn.

7[52:7]

Ende nv heer god is gheloeft dat woert dattu ghesproken hebtste dijnen knecht dauid

8[52:8]

want god heeft ghewoent mitten menschen inder aerden.

9[52:9]

Ist sake dat die hemelen dij niet genoech en sijn hoe veel meer dit huys dat ic ghetimmert heb

10[52:10]

Mer wilt aensien tot dat ghebet dijns knechtes ende sijn strrke bedinghe dat du here verhoren wiltste die oetmoedicheit des ghebedes welc dijn knecht huden bidt voer dij.

11[52:11]

op dat dijn oghen moeten sijn op dit huys dach ende nacht in die stede welc du geseit hebtste dat dijn naem sal worden aengheropen: ende du moetste verhoren tghebet welc dijn knecht bidt in deser stede

12[52:12]

ende wilt verhoren die bedinge dijns kindes ende dijns volcs israhel ist sake dat si bidden in dese stede

13[52:13]

ende wilt verhoren in die stede uwer woninghe vanden hememel: ende ic begheer dattu verhoertste. ende ghenadich biste ist sake dat enich man sondighen sal teghen dij.

Hier gaet wt salomons ghebet.