Bible in duytsche (Delftse bijbel 1477)

§ Capittel .I.

1

MInnet die gerechticheit: die dat lant oerdelt. Gheuoelt vanden here in guetheden: ende soecten inder simpelheden der herten.

2

Want hi wort gheuonden vanden ghenen. dien niet en becoren: ende hi openbaert den ghenen die in hem geloeuen.

3

Want verkeerde ghepensen maken een verscheiden van gode: mer die geproefde doecht berispt die onwijse.

4

Want in een quaetwillighe ziele en sal die wijsheit niet comen: noch si en sal niet wonen inden lichaem dat den sonden onderdanich is.

5

Want die heylighe gheest vander disciplinen hi sal

[p. *258]

den gheueinsden dinghen ontvlien: ende hi sal hem afkeren vanden ghepense die sonder verstandenisse sijn: ende hij sal berispen vander opcomender quaetheit.

6

Want die gheest der wijsheit is guedertieren. ende hi sal der vermaledide niet verlossen van sinen lippen: want god is sijnre nieren ghetughe. ende hi is ghewaerlijc een ondersoker van sijnre herten: ende wachter van sijnre tonghe.

7

Want des heren gheest heeft veruolt die werelt. Ende dat alle dinc behout heeft die const der stemme.

8

Om dit en mach niet verburghen sijn den ghenen die onrechte dinghen spreect: noch dat berispende vonnisse en sal dien niet ouerliden.

9

Want in eens nydichs ghepens sal een vrage wesen: mer dat horen van dier reden sal tot gode comen: ende tot sijnre quaetheit berispinge

10

Want dat oer des horens hoert alle dinc ende tgherucht vander murmeracien en sal niet worden verborghen.

11

Daer om wachti van murmeracien die niet en vordert: ende spaer dijn tonghe van achter sprake te spreken. Want duuster reden en sal niet idel gaen: want die mont die lieghet dodet die ziele.

12

En wilt niet minnen die doot inder dwalinge uwes leuens: noch en beiaghet dat verlies niet inden wercken van uwen handen.

13

Want god en maecte die doot niet: noch hi en verblijt niet inder leuender verlies.

14

Want hi sciep alle dinc om dat si wesen souden: ende hi woude dat die gheslachten vander aerden souden sijn gheneselijc: ende in hem en is geen medecine der verderfnisse. noch der hellen rijc en is niet i die aerde.

15

Want die gerechticheit is ewich ende ontsterflijc:

16

mer die ongherechticheit is dat beiach der doot. Mer die nydighe hebbense doen comen mit handen ende mit woerden: ende si achtense ene vriendinne. ende liepen tot haer. ende si setten beloften an haer: want si sijn der doot waerdich die van haerre pertyen sijn