Bible in duytsche (Delftse bijbel 1477)

§ Capittel .xij.

1[11:10]

DOe wech die gramscap van dijnre herten: ende doe of die quaetheit van dijnen vleysche Want ioncheit ende weelde. die sijn ydel.

2[12:1]

Ghedencke dijns sceppers inden daghe dijnre ioghet. Eer die tijt coemt dijnre quellinghe: ende eer die iaren naken daer du of sulste segghen. si en ghenoghen mij niet.

3[12:2]

Eer die sonne donckert. ende dat licht ende die mane. ende die sterren: ende eer die wolken wederkeren naden reghen.

4[12:3]

Als die wachters vanden huse sullen worden beruert ende die alre starcste mannen hem sullen verwandelen: ende die in ellende sullen ledich sijn verminret van ghetale: ende si sullen verdonckert worden siende doer die gaten:

5[12:4]

ende si sullen die doren sluten ende die straten inder nederheit der gheenre stemme die maelt: ende si sullen opstaen tot eens voghels stemme ende alle die dochteren vanden sanghe sullen swighen.

6[12:5]

Die hoechte sullen ontsien: ende si sullen hem vresen inden weghe. Die amandel boem sal bloyen: ende die spelt hane sal vet worden: ende die capparen sullen worden ghescheiden. Want die mensche sal gaen int huis

[p. *252]

sijnre ewicheit: ende si sullen inden straten ommegaen wenende.

7[12:6]

Eer dat die silueren coerde sal worden ghebroken. ende eer die gulden huuf sal weder worden lopende: ende eer die canne sal breken op die fonteyne. ende eer dat wiel sal worden te broken op die cysterne.

8[12:7]

ende eer dat ghestubbe wederkeren sal in sijn lant van daent was: ende eer die gheest wederkeren sal tot gode dien gaf.

9[12:8]

Ydelheit der ydelheden seit ecclesiastes: ende alle dinghen sijn ydelheit.

10[12:9]

Ende om dat ecclesiastes die alre vroetste was: soe leerde hij dat volc ende vertelde dat hij gemaect hadde ondersokende soe maecte hi veel parabolen.

11[12:10]

Hi sochte oerbaerlike woerden: ende hi screef alte gherechtighe reden ende vol van waerheden.

12[12:11]

Der vroeder woerden sijn garden ende ghelijc naghelen die in dat hoghe doernaghelt sijn: welke woerden ghegheuen sijn van enen herder. biden meesters rade.

13[12:12]

Kint mijn soeke nemmermeer dinc van dese. Veel boken te maken en is gheen eynde: ende een paerlijc pensen is des vleyssches quellinghe.

14[12:13]

Horen wi alle te gader dat eynde vanden spreken. Ontsiet gode: ende behuet sijn geboden. Want dit is elc mensche sculdich.

15[12:14]

Ende alle dinghen die gheschien die sal god toebrenghen int oerdel voer alle menschen: weder dat guet of quaet is

Hier gaet wt ecclesiastes.