Bible in duytsche (Delftse bijbel 1477)

[1]

1

ECclesiastes dauids sone des conincs van iherusalem seit dese woerden

2

Ydelheit der ydelheden spreket ecclesiastes: ydelheit der ydelheden ende alle dinc sijn ydelheit.

3

Wat heeft een mensche meer van al sijnen arbeit: die hi arbeit onder die sonne.

4

Tgeslachte lidet voer ouer ende tgheslachte comt toe: mer die aerde staet ewelijc.

5

Die sonne gaet op ende neder: ende keert weder tot haerre stat: ende dan verrijst si weder

6

ende si gaet omme alle die zwtzide: ende sij daelt neder ten noerden. Die wint gaet alle dinc omme ende omme of doerulieghende of suuerende ondersokende: ende hi keert weder in sijn ringe.

7

Alle vloeden gaen in die zee: ende die zeen vloeyen ouer. Ter steden daer die vloeden wtcomen so keren si weder: om dat si weder vloeyen sullen.

8

Alle dinghen sijn pijnlic: een mensche en machse niet verclaren mit reden. Die oghen en worden niet versadet van sien: noch die oren en worden niet veruolt mit horen.

9

Wat is dat was? Dat selue dat toe te comen is. Wat is dat ghemaect is? Dat selue datmen maken sal. Onder die sonne en is niet nyeus:

10

noch niemant en mach seggen: sich dit is versch Want te hant is voerleden in die werelden: die voer ons waren.

11

Der eerster ghedencken en is niet: noch oeck van dien dingen die hier na toe te comen sijn. ende sal wesen gheen ghedencken mitten ghenen die toecomende sijn inden

[p. *242]

vtersten daghe.

12

Ic ecclesiastes was coninc van israhel in iherusalem:

13

ende ic voersette in mijnen moede te soken ende wijselijc te besoken van allen den dingen die onder der sonnen gheschien. Deser alre quaetster onledicheit gaf god der menschen kinderen: dat si hem daer in sullen veronledighen.

14

Ic besach alle dinghen die gheschien onder der sonnen. ende sich si sijn alle ydelheit ende quellinghe des gheestes.

15

Men en kan die verkeerde niet ghebeteren: ende een onuertellijc ghetal is der sotten.

16

Ic sprac in mijn herte ende seyde. Sich ic bin groot ghemaect ende ic bin bouen ghegaen in vroetscappen alle den ghenen die voer mi waren in iherusalem ende mijn ghedachte heeft veel dinghen vroedelijc ghepenst ende ic hebbe gheleert:

17

ende ic gaf mijn herte om dat ic weten soude wijsheit ende leringhe: ende dwalinghe ende sotheit. Ende ic bekende dat in desen was arbeit ende quellinghe des geestes:

18

om dat in veel vroetscappen veel onwaerdicheden is: ende die daer const toedoet hi doeter oec toe