Bible in duytsche (Delftse bijbel 1477)

§ Ca .xxxi.

1

DEs conincs lamuels woerden. Een visioen daer hem sijn moeder mede leerde.

2

Wat ist mijn wtuercoren Wat ist wtuercoren mijns buurs: wat ist wtuercoren mijnre begheerte?

3

Den wijuen en ghif dijn guet niet: noch dijn rijcheden om die coninghen of te doen.

4

En wil niet den coninc o lamuel. en wil den coninghen gheen wijn gheuen: want ghene heymelicheit en is daer dronckenscap regneert.

5

Dat si licht niet en moeten drincken ende vergheten der oerdelen: ende verwandelen der armer kinder saken.

6

Gheeft den drouighen ghemaecten dranc: ende wijn den ghenen die van bitteren moede sijn

7

Dat si drincken ende dat si moghen vergeten haer ghebrec. ende dat si voertmeer haers rouwen niet en moeten ghedencken.

8

Ondoe den stomme dijnen mont: ende tot alder kinder saken die voerbi liden.

9

Ondoe dijnen mont: oerdele dat gherecht is: ende wreect den maten ende den armen menschen.

10

Aleph. Wie sal vinden een starc wijf? Haer loon is van verren ende vanden lesten vander aeren

11

Beth. Haer mans herte betrouwet in haer: ende sij en sal niet behoeuen van rouen.

12

Gimel. Si sal hem geuen guet ende gheen quaet: alle die daghen sijns leuens.

13

Deleth. Si sochte wolle ende vlas: ende si wrochte mitten rade haerre handen.

14

Hee. Si is ghemaect als een coepmans scip: die van verren sijn broot brenget.

15

Uau: si stont op bi nachte: ende si gaf haren huis luden roef: ende spise haren ionc wijuen.

16

Zay. Si mercte den acker ende coften: si plante enen wijngaert vanden vrucht haerre handen.

17

Heth. si gorde haer lenden mit starcheden: ende si verstracte haren arm.

[p. *241]

18

Teth. si smaecte ende sach want haer comenscap guet is: haer licht en sal niet worden wtghedaen inder nacht

19

Ioth. Si stac haer handen totten stercken dinghen: ende haer vingheren begrepen die spille.

20

Kaph. si ondede haer hant den maten. ende si stac haer palmen totten armen.

21

Lamech. Si en sal niet ontsien haer huus voer die couden des snees: want al haer huusluden sijn gecleet mit ghevoerden clederen.

22

Mem. Si maecte tot haer behoef een strijpt cleet: bissus ende purpur is haer aendoen

23

Nun. Inder poorten is haer man edel: als hi sit mitte senatoers vanden lande.

24

Samech. Si maecte een hemde ende vercochtet: ende. si leuerde chananeo een gordel.

25

Ayn. Bestarcheit ende schoenheit is haer cledinghe: ende si sal lachen inden lesten daghe.

26

Phe. Si ondede haer mont te vroetscappen: ende die wet der goedertierenheit is in haer tonge

27

Sade. Si anmercte den wech haers huus: ende si en at haer broot niet ledich

28

Coph. Haer kinder stonden ende si predictense alte salich: ende haer man hij loefdese.

29

Res. Veel dochteren vergaderden rijcheden: du biste bouen hem allen ghegaen.

30

Syn: die gracie der schoenheden is ydel ende bedreghelijc: een wijf die den here ontsiet salmen louen.

31

Thau. gheeft haer vanden vrucht haerre handen: ende haer werken sullense louen inder poerten

Hier gaen wt salomons parabolen.