Bible in duytsche (Delftse bijbel 1477)

§ Capi .ij.

1

INden vier ende twintichthsten dach des maents in die seste maent

2

int anderde iaer darij des conincs in die seuende maent opten een ende twintichsten dach des maents: is gheschiet twoert

[p. *569]

des heren in die hant aggei des propheten segghende.

3

Spreect tot zorobabel salathiels soen den hertoech van iuda ende tot ihesum iosedechs soen den groten priester: ende tot die anderen des volcs segghende.

4

Wie onder v is ghelaten die dit huys gesien heeft in sijnre eerster glorien? Ende wat siedi nv dit huys Ende ist nv niet also oft niet en waer in uwen oghen.

5

Ende nv seit die here zorobabel wort ghesterct: ende ihesu iosedechs soen grote priester wort ghesterct: ende god der scaren seit. alle volc der aerden wort ghesterct ende maect: want die here der scaren seit ic bin mit v.

6

Dat woert dat ic mit v ouerdraghen heb doe ghi wtghinct vanden lande egipti ende mijn geest sal sijn int middel van v. Wilt niet ontsien:

7

want dit seit die here der scaren. Noch is een weynich: ende ic sal beroeren hemel ende aerde zee ende droechte.

8

Ende ic sal beroeren alle volcken: ende die begheert is van allen volcken. sal comen. Ende ic sal veruollen dit huys mit glorien: seit die here der scaren.

9

Die here der scaren seit: tsiluer is mijn ende tgout is mijn.

10

Die here der scaren seit: groet sal sijn die glorie des laetsten huys meer dan des eersten. Ende die here der scaren seit: ic sal gheuen vrede in dese stede

11

Inden vier ende twintichsten dach der negender maent int anderde iaer des conincs darij: is gheschiet twoert des heren tot aggeum den propheet ende seyde.

12

Dit seit die here der scaren. Vraecht die priesteren die wet ende segt

13

Of een mensch naem geheilicht vleisch inden geer sijns cledes: ende roerde mitten opperste broet of toespise of wijn of olie of alle spise: sal si heilich worden? Mer die priesteren hebben gheantwoerd ende hebben gheseit. Neen.

14

Ende aggeus heeft gheseit. Of die besmet is inder zielen roerde van al desen en salt niet ontreynt worden? Ende die priesteren hebben gheantwoerd: ende hebben gheseit. Het sal ontreint worden.

15

Ende aggeus heeft gheantwoerd ende gheseit. Die here seit: alsoe is dit volc ende alsoe dit gheslacht voer mijn aensicht. ende alsoe is alle werck hoerre handen: ende al die dinghen diese mij gheoffert hebben. hebben si ontreynt

16

Ende nv settet uwe herten van desen daghe ende daer bouen. eer die een steen wort gheleit op den anderen in des heren tempel:

17

doe ghi toeghinct tot een hoep coerns van twintich mudden ende tworden thien: ende doe ghi inginct tot die wijnpars dat ghij wtdrucken soudt wijftich flesschen ende tworden twintich.

18

Ic heb v geslaghen mit enen barnende wint: ende mit een droghen wint ende mit hagel alle wercken uwer handen: ende die heer seit nyemant en was onder v die weder keerde tot mi

19

Set v herten van desen dage ende intoecomende vanden vier ende twintihsten dach der neghender maent vanden daghe: in welken die fondamenten des heren tempels gheleit sijn set op v herte.

20

Is nv daer saet in die knoppe? Ende die wijngaert ende vijchboem ende appelgranaten boem ende olijuen boem en hebben noch niet gebloeyt. Van desen

[p. *570]

daghe sal ic benedien.

21

Ende twoert des heren is ghesciet anderwerf tot aggeum inden vier ende twintichsten dach des maents ende seide.

22

Spreect tot zorobabel den hertoech van iuda ende segt Ic sal beroeren hemel ende aerde te samen:

23

ende sal omkeren den stuel der riken: ende ic sal te wriuen die stercheit des rijcs der heydenen. Ende ic sal omkeren den waghen ende sijnen opclimmer: ende die paerden sullen nedergaen ende hoer opclimmers: ende die man sal vallen inden zwaerde sijns broeders.

24

Die here der scaren seit zorababel salathiels soon mijn knecht in dien dage sal ic di aennemen: ende sal di setten als een teyken: ende die here der scaren seit want ic heb di wtuercoren.