Bible in duytsche (Delftse bijbel 1477)

§ Ca .I.

1

INt anderde iaer des conincs darij in die seste maent op den eersten dach des maents is ghesceit twoert des heren in die hant aggei des propheten tot zorobabel salathiels soen hertoech van iuda ende tot ihesum iosedechs soen den groten priester ende seit

2

Dit seit die here der scaren ende spreect. Dit volc seyt. Die tijt en is noch niet ghecomen dat des heren huys ghetimmert sal worden

3

Ende sheren woert is gheschiet in die hant aggei des propheten segghende

4

En is v die tijt niet dat gi woent in curiosen huysen die bescoten sijn: ende dit huys is achter ghelaten?

5

Ende die here der scaren seit nv dit. Set v herten op v weghen.

6

Ghi hebt veel ghesaeyt: ende wenich in gebrocht Ghi hebt ghegeten ende en sijt niet sat geworden. Ghi hebt ghedroncken: ende en sijt niet droncken gheworden. Ghi hebt v ghedect. ende en sijt niet warm geworden. Ende die loen vergadert heeft: heeft dat geworpen in een doersteken sac.

7

Die here der scaren seit dit. Set v herten op v wegen.

8

Climt op inden berch ende draecht hout: ende timmert een huys. Ende tsal mi ontfanclic sijn: ende die here seit ic sal worden gheeert.

9

Ghi hebt om ghesien tot meer: ende siet tis gheworden myn. Ende ghi hebt in ghedragen int huys: ende ic heb dat wtgeblasen Die here der scaren seit om wat saec? Want mijn huys is achter gelaten: ende ghi haestet een ygelijc in sijn huys.

10

Daer om sijn op v verboden die hemelen dat si niet en sullen gheuen douwe. ende die aerde is verboden dat si niet en sal geuen hoer vrucht.

11

Ende ic heb gheropen droechte opter aerden ende op die bergen ende op den tarwe ende op den wijn ende op die olye ende op al dat die aerde voert brengt: ende op die menschen ende op die beesten: ende op alle arbeit der handen.

12

Ende zorobabel salatiels soen ende ihesus iosedechs soen die grote priester. ende alle dander volcken hebben gehoert die stemme hoers gods ende die woerden aggei des propheten als die here hoer god hem ghesent heeft tot hem: ende al tvolc heeft ontsien van sheren aenschijn.

13

Ende aggeus sheren bode heeft gheseit: vanden boden des heren sprekende den volc. Die here seyt Ic bin mit v.

14

Ende god heeft verwect den geest zorobabels salathiels soen des hertoechs van iuda ende den gheest ihesu iosedechs soen des groten priesters ende den gheest der anderen van alden volc: ende sijn in ghegaen ende hebben gedaen twerc: inden huse des heren der scaren hoers gods.