Bible in duytsche (Delftse bijbel 1477)

§ Capitel .iiij.

1

ENde ionas is ghepijnt mit groten verdriet: ende is toernich gheworden

2

ende heeft ghebeden totten heer: ende heeft geseit. Heer ic bid: en was dat niet mijn woert doe ic noch was in mijn lant? Daer om docht ic te vlien in tharsis. Want ic weet dattu sijtste god guedertieren ende barmhertich: ende van veel ontfermenisse ende vergheuende die misdaet.

3

Ende heer ic bid nv neemt mijn ziel van mi: want die doot is mi beter dan tleuen.

4

Ende die here heeft geseit. Waenstu dattu mit recht toernich biste?

5

Ende ionas is wtghegaen vander stat: ende heeft gheseten tegent oeste des stads. Ende hi heeft hem seluen gemaect een scerm: ende heeft onder dat gheseten in die scaduwe: tot dat hi sien mochte wat der stat gheuallen soude.

6

Ende god die heer heeft bereit ederen ende clam op ionas hoeft op dattet sijn soude een scaduwe op sijn hoeft: ende hem beschemen soude. Want hij had ghearbeit. Ende ionas is verblijt van die ederen mit groter blijscap.

7

Ende god heeft bereit enen worm inden opganc der dagheraet des anderen daghes: ende heeft ge-

[p. *553]

slaghen die edere ende si is dorre gheworden.

8

Ende doe die sonne was op ghegaen. heeft die heer gheboden den heten wint ende bernende: ende die sonne heeft gheslaghen op ionas hoeft: ende hi is heet geworden. Ende hi begheerde sijnre zielen dat hi steruen mochte Ende hi heeft ghesit. Te steruen is mi beter dan te leuen

9

Ende die heer heeft geseit tot ionam. Meenstu dattu mit recht toernich biste op die ederen? Ende hi heeft gheseit. Ic bin mit recht toernich totten dode toe.

10

Ende die heer heeft gheseit. Du biste druuich van die ederen daer du niet om gearbeit en hebste noch du en hebstese niet doen wassen. die onder eenre nacht opgegaen is. ende onder eenre nacht vergaen is:

11

daer om en sal ic niet sparen nyniue die grote stat. die meer sijn dan hondert ende twintich dusent menschen: die niet en weten onderscheit tusschen hoer rechter hant ende luchterhant ende veel beesten