Bible in duytsche (Delftse bijbel 1477)

§ Capit .xxij

1

DUs leden drie iaer sonder strijt tuschen syrien ende israhel.

2

Ende inden derden iaer so ginc iosaphat die coninc van iuda neder totten coninc van israhtl.

3

Ende die coninc van israhel seide tot sinen knapen En weti niet dat ramoth in galaad ons is ende wi verrokeloesdent te winnen wt sconincs van syren hant?

4

Ende hi seide tot iosaphat. En sultstu mit mi niet comen om te striden in ramoth galaad?

5

Ende iosaphat seide tottten coninc van israhel. Alsoe ic bin: alsoe bistu. Mijn volc ende dijn volc is een: ende mijn gheredene ende dijn gheredene. Ende iosaphat seide totten coninc van israhel. Ic bidde di vraghe huden sheren woert.

6

Hier om vergaderde die coninc van israhel propheten. omtrent vier hondert mannen: ende hi seide tot hem Sal ic gaen in ramoth galaad om te striden ofte sal ic ophouden. Si antwoerden. Ganc op: ende die here salse geuen in sconincs hant.

7

Ende iosaphat seyde. En is hier yemant ne ghene sheren prophete: dat wij hem vragen sullen?

8

Ende die coninc van israhel seide tot iosaphat. Ene man is ouerbleuen daer wij den here bi moghen vraghen: mer ic hate hem. want hine propheteert mij ne ghene guet: mer altoes quaet: mycheas yemla soen. Ende iosaphat seide hem. Coninc en spreke alsoe niet.

9

Ende die coninc riepe enen gelubden camerlinc: ende seide hem. Haeste di te halen mycheas iemla soen.

10

Ende die coninc van israhel ende iosaphat die coninc van iuda saten op haren setelen. gecleet elc mit sinen conincliken clederen op die vloere neuen der poorten dore van samarien: ende alle die propheten propheteerden in haren aenscouwen

11

Ende sedechias chanaans soen had hem yseren horen ghemaect ende hij seide. Dit seit die here. Hier mede sulstu syrien wech blasen: tot dattuut al verdriuen sultste

12

Ende al die propheten propheteerden oec alsoe ende seiden. Ganc op in ramoth van galaad ende ganc voerspoedelic: ende die here sal in sconincs hande sijn viande leueren

13

Ende die bode die ghegaen was om micheas te halen: hi sprac tot hem ende seide. Sich die propheten redenen si voerseggen mit enen monde den coninc guede dinghen. Daer om so si dine redene gelijc haer redene: ende spreec guede dinghen

14

Ende mycheas seide. Leeft die here: want soe wat dat mij die here segghen sal dat sal ic spreken

15

Ende aldus quam hi totten coninc: ende die coninc seide hem. Mycha: sullen wij gaen in ramoth galaad om te striden of ophouden? Hi antwoerde. Ganc op ende ganc voerspoedelike: ende die here salt leueren in sconincs hant.

16

Ende die coninc seide tot hem Echter ende echter beswere ic di: dattu mi niet en spreecste sonder dat waer is in sheren name

17

Ende mycheas seide. Ic sach al israhel ghescheiden inden montaengen: als scape die ne gene herde en hadden. Ende die here seide. Dese en hebben ne genen here: elc keer weder in sijn huys in paeyse.

18

Ende die coninc van israhel seide tot iosaphat. En heb ic di niet ghe-

[p. *481]

seit dat hi mi gheen guet en propheteert: mer altoes quaet?

19

Ende mycheas deder toe ende seide. Daer om soe hoere die woerden des heren Ic sach den here sitten op sinen throne: ende al there vanden hemel mit hem ende omtrent hem staende te sijnre rechterziden ende te sijnre slinckerzide.

20

Ende die here seide. Wie sal achab den coninc van israhel bedrieghen dat hi op gae: ende valle in ramoth van galaad? Ende ter slinckerzide seide een dese woerden: ende een ander anders.

21

Ende een geest quam wt: ende stont voerden here: ende seide. Ic sal hem bedriegen. Ende die here sprac tot hem. Waer in?

22

Ende hi seide. Ic sal wt gaen: ende wesen een loghenachtich geest in al sijnre propheten mont. Ende die here seide. Du sultsten bedrieghen ende verwinnen: ganc ende doch alsoe.

23

Nu sich nv heeft die here in al dijnre propheten mont die hier sijn ghegheuen den gheest der logenen: endie die here heeft ieghen di quaet ghesproken.

24

Ende sedechias chanaans soen quam voert: ende sloech mycheam an die wanghe. ende seide. Heeft mi dan sheren gheest ghelaten: ende heeft di ghesproken?

25

Ende mycheas seide. In dien dagen salmen di sien: dattu int camerkijn gaen sultste binnen der cameren om di te berghen.

26

Ende die coninc van israhel seide. Neemt mycheam ende hij blijft bi ammon den prince vander stede. ende bi ioas amalechs soen:

27

ende segt hem Dit seit die coninc. Legt desen man in enen kerker: ende onthouten mit brode des vernoeys ende mit water des verdriets: tot dat ic wederkeren sal in paeyse.

28

Ende mycheas seide. Keerstu weder in paeyse: so en heuet die here mi niet ghesproken. Ende die coninc seide Gi alle volke hoert.

29

Ende dus toech op die coninc van israhel ende iosaphat die coninc van iuda. in ramoth van galaad.

30

Ende die coninc van israhel seide tot iosaphat. Neem mijn wapen ende trec inden strijt: ende doch mine clederen aen. Want die coninc van israhel verwandelde sijn habijt: ende toech inden strijt.

31

Ende die coninc van syrien had beuolen den twee ende dertich princen vanden wagenen ende geseit. Ghi en sult iegen ne geen cleyn noch groet vechten: sonder ieghen den coninc van israhel allene.

32

Ende doe die princen vanden waghenen iosephat ghesien hadden so waenden si dat hi die coninc van israhel gheweest hadde: ende si maecten gedruysch ende vochten ieghen hem. Ende iosephat riep.

33

Ende die princen vanden wagenen verstonden dat hi die coninc van israhel niet en was: ende si schieden van hem.

34

Mer een man toech wt sinen boghe. ende scoet ene ghescutte daer hij mochte. ende bi gheual raecte hi den coninc van israhel tusschen die longen ende die maghe. Ende die coninc seide tot sijnen waghenmanne. Keer omme dijn hant. ende voere mi vter betaelgien: want ik bin swaerlike ghewont.

35

Dus wort in dien daghe die strijt ghedaen Ende die coninc van israhel stont in sijnen waghen ieghen die van syrien: ende tsauonts starf hi. Want tbluet van sijnen wonden liep inden bodem van

[p. *482]

den waghen:

36

ende eer die sonne onderghinc soe riepe ene heraut in alt heere ende seide. Elc keer weder in sijn stede ende in sijn lant.

37

Dus bleef die coninc doot: ende men voerden in samarien. Ende si grouen den coninc in samarien:

38

ende si dwoghen den waghen inden piscyne van samarien ende die honden lecten sconincs bluet: ende si lecten die breydels na sheren woert dat hij ghesproken hadde.

39

Mer tander van achabs woerden ende al dat hi dede. ende dat yuorien huys dat hi maecte. ende van alden poorten dien hi gesticht had en sijn si niet bescreuen inden boken der woerden vanden daghen der coningen van israhel?

40

Ende aldus sliep achab mit sinen vaders: ende ochosias sijn soen regneerde ouer hem.

41

In achabs sconincs van israhels vierde iaer: soe begonste iosaphat asa soen te regneren bouen iuda.

42

Hi was vijf ende dertich iaer out doe hi begontste te regneren: ende hi regneerde vijf ende twintich iaer in iherusalem. Ende sijnre moeder name was asuba: salai dochter.

43

Ende hi wanderde in asa sijns vaders weghe: ende hij en keerder hem niet af Ende hi dede dat gherecht is in sheren aanscouwen:

44

mer nochtant soe en dede hi die hoechede niet af. Want noch so offerde tvolc ende verbrande wieroec inden hoecheden.

45

Ende iosaphat hadde vrede mitten coninc van israhel.

46

Mer tander van iosaphats woerden: ende sijn wercken die hi dede ende sijn striden. en sijn niet bescreuen inden boke der woerden vanden dagen der coningen van iuda?

47

Ende hi dede oec af vanden lande die ouerbliue vanden droecheden die ouerbleuen waren in asa sijns vaders dagen.

48

Ende doe en was ne geen coninc gemaect in edom.

49

Ende die coninc iosaphat had gemaect een vergadering van scepen in die zee. die varen souden in ophir om gout: mer si en mochten niet gaen: want si worden te broken in asyongaber

50

Doe seide ochosyas achabs soen tot iosaphat. Mijn knapen sullen gaen mit dinen knapen inden scepen. Ende iosaphat en woude niet.

51

ende iosaphat sliep mit sinen vaders: ende hi is mit hem begrauen in dauids sijns vaders stede: ende ioram sijn soen regneerde ouer hem.

52

Ochosias achabs soen begontste te regneren bouen israhel in samarien inden seuentiensten iaer iosaphats sconincs van iuda: ende hij regneerde bouen israhel twee iaer.

53

Ende hi dede quaet in sheren aenscouwen: ende hi wanderde in sijnre vader ende moeder wegen ende in iheroboams nabaths soens weghen: die israhel sondigen dede.

54

Ende hi diende oec baal ende hi aenbedene: ende verporrede den here god van israhel na al dat sijn vader gedaen hadde

§ Hier eyndt dat derde boeck der coninghen