Bible in duytsche (Delftse bijbel 1477)

Ca i

1

NA iosue doot so ghinghen die kinder van israhel den here te rade ende seiden. Wie sal voer ons opgaen ieghen die chananeen: ende maerscalc vanden stride wesen.

2

Ende die here seide Iudas sal opgaen. Siet ic heb hem tlant gheleuert in sinen handen.

3

Ende iudas seide tot symeon sinen brueder. Coemt op mit mi in minen lotte: ende vecht iegen die chananeen ende pherezeen: dat ic oec mitti mach varen in dinen lotte. Ende symeon ghinc mit hem.

4

Ende iudas ghinc op. ende die here leuerde in haren hande die chananeen ende die pherezeen: ende si sloghen doot in bezech thien dusent mannen.

5

Ende si vonden in bezech adonibezech: ende si vochten ieghen hem: ende sij sloghen die chananeen ende die pherezeen.

6

Ende adonibezech vloe: ende si volgheden hem na ende vinghen. als si hem ofghesleghen hadden bouen sine handen ende sine voeten.

7

Ende adonibezech seide Tseuentich coninghen die ic in die hande ende die voete bouen ofgesleghen hadde gaderden onder mijn tafel die reliquien van mijnre spisen: ghelijc als ic gedaen hebbe also heeft mi die here gegouden. Ende si brachtenen in iherusalem: ende daer starf hi.

8

Ende iudas kinderen vochten op iherusalem ende si wonnent: ende sij sloghense in swaerts mont: ende si leuerden alle die stat den brande.

9

Ende daer na quamen si neder ende vochten ieghen die chananeen die inden montaengen woenden: ende ten zuiden inden campaengen

10

Ende iudas tide ieghen die chananeen die in hebron woenden. wies name inden ouden tiden was cariatharbe. ende hij versloech sysai ende hayman ende tholmay

11

ende van daer tide hi voert totten genen die in dabir woenden. wies oude naem was cariathsepher dats die stede van den letteren.

12

Ende caleph seide. Die cariathsepher slaen ende woesten sal: ic sal hem axen mijnre dochter te wiue geuen.

13

Ende doese othoniel cenez soen calephs minste brueder had gewonnen: so gaf hi hem axem sijnre dochter te wijue

14

Ende doese wech voere inden wege. so vermaende hoer haren man dat si van haren vader enen acker heysschen soude. Ende doe si versucht hadde sittende op enen ezel: so seide haer caleph. wat hebstu?

15

Ende si antwoerde. Gheeft mi die benedictie: want du hebste mi dorre lant ghegeuen geeft mi oec veruersschet lant van wate-

[p. *311]

re. Daer om gaf hair caleph versche bouen ende versche beneden

16

Ende cyneus kinderen die moyses neuen waren quamen op vander stede der palmen mit iudas kinderen inder wildernisse van sinen lotte dat is ten zuyden van arath ende sie woenden mit hem.

17

Ende iudas ghinc wech mit symeon sinen brueder: ende si sloghen te gader die chananeen die in sephat woenden ende dodense Ende men heet der poorten name horma dats vermeensaemheit.

18

Ende iudas wan gazam mit haren lande: ende aschalon. ende akers mit haren terminen.

19

Ende die here was mit iuda: ende hi besat die montange Ende hi en mochte niet afdoen die ghene die in die valeye woenden: want si hadden ouertallike cromme wagenen.

20

Ende si gauen caleph hebron also moyses gheseit had: ende hij ofdede vte dien lande drie enachs sonen.

21

Ende benyamins sonen en deden niet af die iebuzeen die in iherusalem woenden: ende die iebuzeen woenden onder benyamins kinderen tot in desen daghe.

22

Iosephs huys ghinc op in bethel: ende die here was mit hem.

23

Want doe si die poorte beleit hadden die te voren luza heet.

24

so saghen si enen man comen vter stat: ende si seiden tot hem. Wijse ons den inganc vander stat: ende wij sullen mitti ontfermherticheit doen.

25

Ende doe hijt hem gewijst hadde: so slogen si die poorte in swaerts mont: mer si lieten dien man ende al sijn maechscap gaen

26

Ende doe si hem hadden laten gaen so ghinc hi wech in tlant van ethim: ende stichte daer een stat. Ende heetse lusam: diemen also heet tot in desen dage

27

Manasses en dede niet af bethsan ende chanath mit haren weghen ende die gene die in dor woenden. ende in ieblaam ende in maiedde mit haren wegen: ende die chananeen begonsten mit hem te wonen.

28

Ende na dien dat israhel verstarct was so daden sijse wesen onder tribuyt ende si en woudense niet afdoen.

29

Ephraym en dede oec niet af die chananeen die woenden in gazer: mer hi woende mit hem.

30

Zabulon en dede niet af die ghene die in tethron woenden ende in naalon mer die chananeen woenden in midden hem: ende hij wort hem tributarius.

31

Azer en dede oec niet af die ghene die woenden in accho ende in sydone ende in alab ende in achazib ende in amma ende aphech ende roob:

32

ende hi woende int midden die chananeen die in dat lant woonden: ende hij en dodese niet

33

Neptalim en dode niet die ghene die te bethsemes woenden ende te bethanath: ende hi woende onder die chananeen die int lant woenden: ende die van bethsamen ende die van bethaniten waren hem tributarise.

34

Die amorreen benauweden dans kinderen inden berghe. ende si en gauen hem ne ghene stat dat hi ten pleyne waert neder comen mochte:

35

ende hi woende inden berch hares dat bediet oerconde in haylon ende in salabim. Ende die hant van iosephs hnus wort verzwaert: ende hi was hem tributarius geworden.

36

Ende amorreus was die stede van des scorpioens steen opgange totten hoechsten steden