Bible in duytsche (Delftse bijbel 1477)

§ Ca .xxxiiij

1

VAnden campaengen van moab ghinc moyses opten berch nebo inden top van phasga iegens iericho: ende die here thoende hem al dat lant van galaad tot dan.

2

ende al neptalim dat lant van effraym ende manasses ende al dat lant totter achterster zee

3

ende die zuytzide ende die breetheit des velts van iericho der stat vanden palmen tot segor.

4

Ende die here seide tot hem. Dit is dat lant daer ic of gesworen heb abraham ysaac ende iacob segghende. Dinen sade sal ict gheuen Du hebstet ghesien mit dinen oghen: ende du en sults niet ouergaen tot daer

5

Dus is moyses des heren knecht daer doot int lant van moab na des heren gebot:

6

ende hi groeffen in eenre valey en inden lande van moab tegen phogor: ende gheen mensche en bekende sijn gracht tot in desen daghe toe.

7

Ende moyses was hondert ende twintich iaer out doe hij starf. Sijn oghe en wort nye verdonckert noch sijn tanden en worden niet beruert.

8

Ende die kinder van israhel beweenden hem dertich daghe inden campaengen van moab: ende die daghen worden voldaen van den ghenen die moyses beweenden.

9

Ende iosue nuns soen wort veruolt mit den gheest der wijsheit: want moyses leide sijn handen op hem. Ende die kinder van israhel waren hem ghehoersaem. ende si deden also die here moysen beuolen hadde

10

Ende voert so en verrees geen propheet in israhel gelijc moyses dien die here bekende van aensichte te aensichte

11

in alle den teykenen ende wonderen. die hi sende mit hem dat hise doen soude int lant van egipten pharaoni ende alle sine knechten. ende allen sinen lande:

12

ende al die vrome hant ende die grote wonderen die moyses dede voer al israhel

§ Hier endt deutronomium twelc tleste boec is van moyses vijf boken