Bible in duytsche (Delftse bijbel 1477)

Ca .I

1

DIt sijn der kinder van israhels namen: die mit iacob in egipten quamen. Ende elc quam daer in mit sinen huysen.

2

Ruben. symeon. leuy. iudas.

3

ysachar. zabulon. ende benyamin.

4

dan. ende neptalin. gad ende azer.

5

Dus waren alle der geenre zielen die wt iacobs dye ghecomen waren tseuentich

6

Mer ioseph was in egipten. Ende doe hi doot was ende alle sine broederen ende alle sijn gheslachte:

7

so wiessen die kinder van israhel. ende als groryende worden si ghemenichfoudicht: ende seer ghestarct so veruolden si dat lant

8

Hier en binnen so rees een nyeu coninc bouen egipten: die ioseph niet en wiste.

9

Ende seide tot sinen volke. Siet dat volck van israhel is vele. ende is starcker dan wi.

10

coemt laet ons wiselic verduwen dattet machschien niet en worde ghemenichfoudicht ende waert dat ons strijt aen quaem: dattet hem niet en doe mit onsen vianden: ende alst ons verwonnen hadde. dattet dan vten lande ghinghe.

11

ende aldus settte hi bouen hem meisters van werke. dat sijse quellen souden mit lasten. Ende si stichten pharao die poerten vanden tabernaculen. phiton ende ramasses.

12

Ende so sijse mere verduweden. so si meer wiesscen. ende worden

[p. *73]

ghemenichfoudicht. Ende die van egipten hatende die kinder van israhel.

13

ende queldense ende bespottense ende benidense:

14

ende si brochten hem haer leuen te bitterheden mit haer werc van slijcke ende van teghelen: ende in allen dienste vanden lande daer si mede worden verladen mit wercken.

15

Ende die coninc van egipten seide den vroeden vrouwen van den hebreuschen volke: die een gheheten sephora. ende die ander phua:

16

ende hij beual hem Als ghi den hebreuschen wiuen helpt inden arbeide. ende die tijt van den dracht toecoemt: ist een knechtgen so dodet. mer ist een meysken so houtet.

17

Ende die vroede vrouwen ontsagen gode: ende si en deden niet na des conincs ghebot van egipten: mer si behielden die knechtgens.

18

Ende die coninc deedse comen voer hem ende seide hem. Wat ist dat ghi doen wilt: dat ghi die kinderen hout?

19

Si anwoerden. Die hebreusche wiuen. en sijn also niet als die wiuen van egipten. Want si hebben die conste van vroede vrouwen: ende si ghebaren eer wi tot hem mogen comen.

20

Ende daer om dede god den vroeden vrouwen wel: ende dat volc wies: ende wort seer starc.

21

Ende om dat die vroede vrouwen. gode ontsagen. so stichte hi hem huysen

22

Ende pharao beual al sijn volc ende seyde. So watter gheboren wort van mans maecsele warptet in die riuiere: ende so wat van wijfs maecsele is dat houdt.