Berliner Liederhandschrift vom Jahre 1568

[70]

Ein annder

Jch můs von hin,
darůmb ich bin,
hertzliebste mein,
Jn schwerer pein,
darzů in grossem schmertzenn,
So ich betrachtt,
bei tag vnnd nachtt,
dein schone zier,
lůst vnnd beger,
darzů ein frůndtlich scherzenn,
Soe moes mein hertzenn,
vor leidenn vnnd schmertz,
Jn rechter leib vnnd traw zergan,
Fůrwar ich sag
das ich mein tagh,
Vff erden ich kein liebere gewan,
scheiden ist bitter dann der Entzian.

Gůett gesell dein fahrt,
die krenckt mich hartt,
das ich nitt mag
kein [stund] jm tagh,
Ja frolich sein vor leide,
Wie soll hinfur
geschehenn mir,
ellendes weib,
so ich dein lieb
verlierenn můs durch scheiden,
So

[fol. 44v]

 

pitt ich dich

 

gantz fleissiglich,

 

vnnd laeß mich dir befolhenn sein,

 

Verges nitt mein,

 

das bitt ich dich,

 

haltt mich ein soette liebde jn dem hertzen dein

 

scheiden ist vber alle pein.

 

 

 

Jůnckfrewlein werdt

 

mich rewett aůff erdtt,

 

sůnst nitt dan dů,

 

so ich mich nhu

 

so gar můs dein erwegenn,

 

Jch befelch mich dir

 

die zeitt hinfůr,

 

dergleich will ich

 

bittenn fur dich,

 

Gott woll dein alzeitt pflegenn,

 

Vnß iß die zeitt,

 

kommenn mitt leidt

 

daß ich dich feins lieb můß verlonn,

 

Beůtt mir dein mundt

 

zů dieser stůndt,

 

sůnst mach vnß werden nimmer baß,

 

Scheidenn maght vnß die aůglein naß.

[Spreuk]

Jch bin from frolich vnnd frey
Vnnd obrechtt darbei
Wer iß der gene dann,
Der von mir bois sagen kan?