Berliner Liederhandschrift vom Jahre 1568

[fol. 16v]

[28]

Ein annder

Rosina war was dein gestaltt,
bei koningh Paris lebenn ,
do ehr hatt den apffell jn seiner gewallt,
der schonster soltt ehr gebenn,
fůrwair geleub mir,
ich hett dich
Paris gesein,
Venus wehr nitt
begabt darmitt,
der preiß wehr dir gegeben.

Hatt ich Virgilius bekantt
dweill ehr dachtt zů schreibenn
von Helena auß dem Grekenn landtt,
Jr zierthe ob allenn weiben,
So hett ehr dir
vill mehr dan Jr,
die schonde zů gemessenn,
mitt der dů hast,
mich hartt vnnd fast,
leibhabentlich besessenn.

Jch weiß hett Pontiůs bei seiner zeitt,
geseinn dich glichenn
Sidonia hett weitt,
von deiner liebdenn mossenn wychehenn,
vnnd ander vill,
darůmb ich will
jr aller lieff rewenn.
vnnd frewen dich,
dein will ich sein,
dweill ich leben jn trewenn.