Inden name des barmhertigen ende goedigen Godts. L. Capittel.
GOdt heeft alle dinghen in sijn handen, het leven ende doodt, ende men siet daer niet int gantsche werck der Scheppinghe, datter yet te vergeefs sy, maer is alles seer wijsselijck verordent. De Duyvelen moeten voor den glantsch des Hemels wechvlieden, ende de ghene die Godt vreesen werden bewaert, ende die hem niet en vreesen die sullen int helsche vyer ghestooten werden, ende Godt sal tot haer seggen: En hebbe ick u niet den boodtschapper ghesonden, daer op sullen sy antwoorden: Ten is niet te vergeefs, dan alleene sy hebben hem wedersproken, ende haer leere voor valsch ghehouden, ende hadden wy hem ghelooft, soo en behoefden wy nu niet inden helschen gloet ghequelt te werden, maer de Godtvreesende sullen statelijck beloont werden. Godt weet alle dinghen, ende hy heeft de Aerde ghemaeckt datmen vande eene plaetse tot de ander wandelen ende handelen mach. Hy laet oock uyt der aerden allerley ghewassen voortkomen tot onderhout des menschelijcken levens, maer sy sal ten laetsten vergaen.
Bedenckt het eynde uwer voorouders ende siet maer aende Vogels onder den Hemel wie haer voedet, en is het niet God die sulcks doet? want buyten Godt en kan u niemant helpen. De ongeloovighe gheraken vande eene dwalinge inde ander.
Als Godt niet en wil dat ghy leven sult, soo en kan u niemant het leven gheven.
Welck is beter, krom, ofte recht te gaen? Godt heeft u dat Herte, de Oogen ende de Ooren ghegheven.
Als men u vraegt na de ure des Iongsten daeghs soo sult ghy antwoorden, dat u die onbekent is, ende men sal Godt daerom vraghen; ten laetsten salmen bevinden wie gedwaelt heeft: Soo het aertrijck alle het water in hem sope, waer wilden wy dan water halen om te drincken?
Auteursrechtvrij