Apollo of Ghesangh der Musen

[Hoort Iupiters scholieren]

Stemme: Alst begint.

HOort Iupiters scholieren
Die blindelijck hantieren
Vreuchde met Venus dieren:
Fadry la la la la la,
Soeckt een Maeght goedertieren,
Dat u niet berout na.

Want trout ghy dan een rijcken

Daer men in alle wijcken,
Aensiet haer doen met strijcken,
Fadry la la la la la,
En door u vinghers kijcken
Soo moet ghy vroech en spa.

En trout ghy dan een armen,

De kinders hoort men karmen,
Door’t ghebreck gaense swermen,
Fadry la la la la la,
Met de mandt aen de ermen,
Bidden op Gods ghena.

Trout ghy een Ionck-vrou schoone,

Yeder mint die ydoone,
En begeert de persoone,
Fadry la la la la la,
Soo hebt ghy vrees voor hoone,
En werdt oock jeloers dra.

Trout ghy dan een leelijcken,

Al konse noch soo prijken
De liefde sal beswijcken,
Fadry la la la la la,
Door’t ghestadich aenkijcken,
’T leelijck verwerptmen dra.

Gaet ghy een oudt wijf trouwen,

[p. 108]

 

Stadich moet ghyse aenschouwen,

 

En ’t oude vel te touwen,

 

Fadry la la la la la,

 

De koop sal u berouwen,

 

’T sal zijn, oude hoer ga.

 

Trout ghy als d’onbekande,

 

Een jonck van kleyn verstande,

 

Tot de nelleboch sonder hande,

 

Fadry la la la la la,

 

’T huys houden dijt tot schande,

 

Groot hertseer volght daer na.

 

Niet dat ick wil verachten

 

Wt jonck of groot van machten,

 

Schoon of van arm gheslachten,

 

Fadry la la la la la,

 

Maer jongh-mans die daer trachten

 

Onghlijcke partuer na.

 

Ghy Princen, t’alder uyren

 

Soeckt deuchdlijcke figuyren

 

Van staet, jae u partuyren,

 

Fadry la la la la la,

 

Daer deucht is sal liefd’ duyren,

 

’T salich sterven volcht na.

Een is noodich.