Apollo of Ghesangh der Musen
(1615)–Anoniem Apollo of Ghesangh der Musen–
AuteursrechtvrijStemme: Wanneer ick slaep.ICk kniel Iofvrou in uvve dove stoep,
Daer ick u met benaude stem aenroep,
De stoep daer ghy te met,, u neder set,
Al isse schoon van steen,, ick drencker int ghemeen
Ick drencker int ghemeen,, in tranen,
Ach tranen die mijn hert doen banen.
Vindt ghy u stoep des morghens niet bedout
Als ghy my 'savondts u ghesicht onthoudt?
Ick meen voorseker ja,, sloeght ghy maer ga,
VVanneer ghy t' al verlicht,, met u moedig gesicht
Met u moedigh ghesicht,, Goddinne,
Goddinne, die ick minner vinne.
Hoe comt het by dat ghy niet eens en acht,
VVat ick u vier, en aenroep dach en nacht,
Ick offer u mijn jeucht,, mijn lust, mijn vreucht,
Mijn vrijheyt en mijn tijt,, mijn ziele die verslijt,
Mijn ziele die ick verslijt,, met steenen,
VVee d'uyr dat ghy my zijt verscheenen,
'T scheen dat het aerdtrijck kruyt noch gras en droegh,
Als my de blixem van u ooghen sloegh,
In't coutste van de vorst,, brandt ghy mijn borst,
Als haghel, ys en snee,, of vvindt en vvinter mee,
Of vvindt en vvinter mee,, doen beven,
Kondt ghy mijn ziel in't vyer doen leven.
'T vyer dat mijn hert in asch verkeeren mocht,
VVerdt van de vloet mijns tranen niet bevocht,
VVaer isser droever hel,, dan mijn ghequel,
Ick brand' en ick verdrenck,, als icker aen gedenck,
Als icker aen ghedenck,, o schoone,
O al te vvreeden liefdens loone.
|
|