Apollo of Ghesangh der Musen



[pagina 39]
[Thetis ghy zijt al te schuw]
Voys: Elaes Amour. THetis ghy zijt al te schuw, Al u vechten en verweeren Tergen my veel meer om u, Schoone vruchten te begeeren, Waerom doedy dan soo noo ’T gheen den Hemel wil alsoo. Al de listen die ghy doet Om mijn vlammen uyt te blasen: Siet, het is al nieuwe gloet Die mijn sinnen meer doen rasen, Niemant kan doch niet ontgaen ’T gheen de Goden soo verstaen. Na mijn oogh u heeft ghesien, Na mijn mondt u lipkens kusten, Waerom soeckt ghy my t’ontvlien, ’T schijnt mijn lijden moet u lusten, Hoe wel dat mijn eerste min Met gheboorte nam begin. Maer ’k hoop dat de groote pijn Die u strafheyt my kan baren Sal mijn vreucht doen grooter zijn Als ghy goedertieren garen, Kennis neemt dat al mijn hoop Oorspronck krijght van ’sHemels loop. Schaemt u niet te zijn beweeght, Van die al u schoonheyts gaven Hoogh tot in den Hemel dreeght, Al sijn hertseer en sijn slaven, Berghen, rotsen schier verset Thetis gaen wy vry nae ’t bedt.