Apollo of Ghesangh der Musen

Sangh.

Op de stem: Ne vous offences Madame.

DIanira ick kent u vvesen,
Trotst des Hemels Goden hoogh,
En u ooghen hoogh ghepresen
Trotsen ’t eenigh vverelts oogh.

Lelien en Roosen t’samen

Op u vvanghen zijn ghemenght,
En u vlechten ’t gout beschamen
Dat men uyt Milanen brenght.

Ick beken ’t zijn groote krachten,

Doch gheen vvonder gheeft het mijn,
Dat sy niemandt t’onder brachten
Want sy niet ghevvapent zijn.

Hoogh en uytghenomen sinnen

’T herte dat de minne vliet,
’T vvapen daer’t mee is te vvinnen
Is beleeftheyt, anders niet.

Veele vrouvven die gheboren

Zijn ghevveest van krachten slecht,
Hebben in het ziel bekoren
Hier mee vvonder uytgherecht.

Die aen schoonheyt haer vergapen,

Of aen’t vvesen hoogh gheacht,
Dunckt my dat haer sonder vvapen
Laten vvinnen van de kracht.

Ghy versuurt uvve manieren

Met u trots en hoverdy,
Hoe veel d’ander gaven cieren
Alsoo veel ontcieren zy.

Ghy moocht ander gaen vermaken

Die soo schoon u selven vijndt,
Ivliette doet my blaken
Die my veel volmaeckter schijnt.

Ivliette dunckt my vvaerdich

Datse mensch en Goden brandt,
Die met haer beleeftheyt aerdich
Ciert haer edel heus verstandt.