Antilliaanse Cahiers. Jaargang 3

[p. 70]

Chandi Lagun

Camind'i Cruz

Un dialog na Corsow

18 maart, manesé di elección. Atardi band'i kwatoor, Lugá unda caminda di Santa Rosa ta dobla bai Santa Catarina, cu apenas un subida, i pa otro banda ta sigui recht na Montana. Di autonan cu ta pasa de bes en cuando, tin cu ta hiba bandera national y otro bandera democrat. Den aire ya tin un tristesa, secu, sin compasión, sin lágrima. Na banda robés un botiquín. Aki rond hende ta weta algun paloe die kadoesji, wabi y otro mata chikitoe, toer sin flor. No tin muchu nubia i esunan cu tin ta casi sin moveción.

Perul cu ke krusa pa soebi seroe di Santa Catarina ta keda para. E ta weta Pascual saliendo foi botiquin.

perul ki tal, broe. Ki donder bo ta hasi den botiquin. Ni un better nan ta doena aji.

pascual: Leboemain better. Boso semper ta perde cabes Si no ta koe better ta cu doktool, si no ta cu doctool ta cu pastool i sino ta cu pastool ta cu butisji di ron.

perul: (ta keda weta un poco pensativo) ai ai ta com'tasina Pascual. Pakiko sara bo curpa? Ta malu pa curason Atamaki pará. Bo mes sa min' gusta e sonny boy riba bo cabes ej. E ta parsemi sumamente ridículo.

pascual: sigur no, asina barbón a sinja boso.

perul: (no ta hasi caso di e chanza laf) ma esta hopi dia mi'n weta bo. Wel asina ba sali foi botiquin, mi di hej laga nos weta ki tal di nos paysano Pascual.

[p. 71]

pascual: (de repente su beis ta drecha) Jesus, bo tin razon primo, maske bo tun smeerlap eerste klas. Esta bon rato nos a pasa tempoe nan aja.

perul: ai si bo ta korda dia nos ra traha na Motet?

pascual: Bou Captain Newton.

perul: Esei tun macho, un homber toer afo.

pascual: E joe sin salié, esei ta miembro di un partido horroroso.

perul: (di bon curason atrobe ta laga bula i ta bati lomba di su amigo bieuw) bon'ta korda k.n.s.m.?

pascual: I na waf di Skalo i na Isla. Si, esei tabata tempoe e tempoe bieeuw n'ei.

perul: Mi ta korda cu tabo a sinja nos com traha dos dia di siman caba ganja malu pa bula pipa foi trabouw, anto gana double trahando pa otro hende.

pascual: (cabes den biento) Sin duda mi te homber di mas dzjispaus di Corsow.

perul: (pensativo) I toch bo sa, primo, manera mi ta wetabo i manera mi conosebo ya toer mi bida, mi ta kere bo'n ta pensa semper manera mester ta.

pascual: (beis a dania) Tend' un kos, sjouroe. Stop di frega. Koe bo ke bisa un koos bisé No dal buelta. Ta ki bo ke meen?

perul: No consumi, paisano, papia cu calma. Bon ta corda kwater anj pasá cu ta tin un huelga na k.n.s.m.?

pascual: Sigur mi ta korda esej i mas koos tambe.

perul: Wel laga otro koos boela.

pascul: O kee.

perul: Bon ta korda koe na un cierto momento nan kera hisa nos plaka. Nos toer tabata conforme. Ma abo ker a sigui cu huelga.

pascual: Pasobra mi ta tin razon.

[p. 72]

perul: No pasobra bo ta tin razon ma pasobra ta extremista mes bo ta.

pascual: No bon ta compronde nada. Nada nada. No ta extremista mi ta. Ta berdad i sinceridad mi ta busca. Mi ta busca nan full.

perul: Laga mi bisabo un cos Pascual. Bosabi kiko e palabra full ej ta nifica na Ingles? ‘Fool’ ke meen hende loco.

pascual: Anto bo ke meen cu ta hende loco mi ta.

perul: Si de e manera cu bo ta pensa ta hende loco so ta pensa.

pascual: Scuchami bon Hende loco no ta hende di sinceridad i berdad ni mees hende extremista. Hende loco ta hende cu ta sufri di idolatria.

perul: Ai ai ta kom tasina. Ma compronde caba. Ta nos ta sufri di idolatria. Idolatria pa doctol cu nos boton cu nos barbón.

pascual: I cu boso fanfaron i boso chambon. I ta sina ta tambe, di berde berde.

perul: Ma tende un cos aki, mucha nosentu. Ba weta nunca den bida un hende sin un dios, si un muhé of sin un ideal ke por adora.

pascual: Sigur ma weta hopi hende den bida cu ta sufri di idolatria i tin masjá poco hende cu ta adora e kos cu ta sali di nan mes curason.

perul: E cos cu tin ta cu abo no ta compronde doctor.

pascual: (un poco zier) Anto splicami, primo, splicami.

perul: Loke e ke ta pa toer hende ta igual na nos isla. Ma hopi di e hende nan ta un poco tapá ainda, nan ta sonja ainda di tempu colonial. Tapesei doctor ta echa tantu piquete. No kere ke mes ta gusta coi loco nan asina, e ta hende k'a duka.

pascual: (beis ta drecha) Ta kaduká bo ke meen, no?

perul: Ai Pascualito, laga nos dera hacha i laga nos papia agradablemente, maske ta pa un momentico.

[p. 73]

pascual: Wel tur cos ca posibel den bida. Laga mi contabo un historia cu bo tambe lo goza. Wel mi conose dos dams cu ta sirbi serca Sjon Carlos i Sjon Maria. E sjon nan ei tambe ta un pokito triste coló, ma como nan tin conoci na Skalo i como nan ta amigoe di un Sjon grandi cu ta tin aki, wel laga nos bisa nan ta hende blancu. Wel e sjon Carlos aji ta bisa e dos dams nan un dia: tende un cos muchanan, cu boso ke bai reunion di partido nan, cordabon no tami ta kita boso. Wel e dams nan a respondé: si meneer, awe nochi nos ta tin masjá gana di bai reunion. Wel un anochi nan a bai es un i oter anochi nan a bai e otro. Despues di algun tempo nos sjon ya aki riba mentá a puntra e dams nan: wel muchenan, boso a tende nan papia. Ta pa ken boso tej vota. I bo sa Perul kiko a muchanan a contestá?

perul: No kiko?

pascual: Wel koen kara mas secu cu di makako nan di: Pa Sjon Carlos i Sjon Maria.

perul: No broe no bisami.

pascual: (ta baster di harimentoe) Nan a pompa nan bon pompá (e ta bati loma di Perul) bosá loke ta mas komiek. Meneer i mevrouw a tuma cos na serio, nan ta kana rond konta toer nan amistad nan kon bobo hende di koenoekoe ta.

perul: Laga para, esta baina.

(E koenoekeros nan ta grita di hari. Nan ta bati oter su lomba. Ma de repente Pascual su beis ta danja atrobe, su sanger ta keinta.)

pascual: Tende un kos, sjorromboe. A la fin ala fan, boso te mes smeerlap ke sjonnan i pió ainda.

perul: Ta ken kubo ju, ki bo ke meen.

pascual: Wel sjouroe, bon kaba di bisa cu doctol tambe ta bisa ke hende nan di koenoekoe ta bobo i bon tapá?

perul: Ta unda ba sali ke sej?

[p. 74]

pascual: E sjouroe a loebida lo ke e la caba di bisa.

perul: Tabo disgracia cu maske kiko pasa abo lo keda extremista.

pascual: Wel a mi ta stick pa mi libertad, sinceridad i berdad.

perul: Pa hende manera abo no tin lugá den es mundo aki.

pascual: ‘Es mundo aki’ ta palabra di pastol.

perul: Hende manera abo lo worde derá bon derá.

pascual: Anto ta moeri mes mi tin koe moeri.

perul: Konkoe baj laga bai. Kiko nos kehasi? Ma kwalkié dia bo mester di mi, bin na mi kas, mi lo yudabo tanto koe mi por.

pascual: Si, ora ma bira chocho, caca.

Cada un ta sigui su caminda. Scuridad ta koeminza kai den koenoekoe. Bientoe ta lanta un frescura agradable. Ma toch ta keda e mes tristesa, secu, sin compasión, sin lágrima.

corsow, 20 di Maart 1948