Antilliaanse Cahiers. Jaargang 3

[p. 39]

Tip Marugg

Un butishi bashi

Mi ta lèn kantu di un borchi kaminda tin skibi ta taha pa huma i mi ta sende un sigaria ranka un huma.

Na un distansha chikitu tin dos muhé pará riba asera ta kombersa. Kaminda mi ta pará mi por tende kiko nan ta papia, de bes en kwando nan ta baha nan stem i hala kabes kantu di otro. Nan lip no ta keda para ketu ni un momentu. Esun mas biew ta splika e otro den tur detaje kon e mester mata su kasá, pero e otro ta protesta i ta bisa ku e stima su kasá. Ademas e tin gana di tin un ju.

Un kachó ku ta drumi na skina di anchi i ku no a aisa su kabes wak ningun hende ku ta pasa, ta kuminsa grita di remata ora e mira un polis ta bini. Ni maske ta ladron el a weta! E polis ta mandé un ‘godverdomme’ i mes momentu e ta sak kabes sigi drumi.

Mi ta kuminsa kana. Ora mi pasa dilanti di misa mi ta tende kon p'aden tin un tambu ta lora i kon un stem di muhé, ku ta zona manera stem di homber, ta kompajé ku lélélé... lélélé... stret bai sin stop. Mi mester hari den mi mes. E muhé ku ta kanta ei sigur sigur ta bai largu shelu ora e muri. Pero kiko ta dje dos muhenan pará riba asera ku ta kombersa riba matamentu? Esun biew mi ta kere ta bai shelu. Esun jong no, pasobra e no por muri ainda: e tin gana di tin ju.

Pero si e muhé biew por bai shelu, anto ké ubo di e polis, e kachó, e homber ku a traha e borchi ta taha pa huma i esun ku mi a kumpra e paki di sigaria seka dje?

Ora luna saka su kara foi tras di un kas mi ta weté pa solo,

[p. 40]

pero ora mi mira al gun strea kologa den palu, mi ta realisa ku ta anochi awor aki ra.

Awaseru ta kuminsa kai manera tata di i hij ta kita mi sombré for di mi kabes.

Awa ta muha mi sigaria i e ta dunami un smak marga den mi boka. Mi ta benta e sigaria door di jalusí di un kas i mi ta saka un otro for di e paki. 45 Sen ma paga pa e paki di sigaria aki. Promé nan aja, un paki di sigaria tabata kosta dies plaka.

Pero kiko ke hasi, awor aki tur hende mes a bira ladron. Ami t'e ladron di mas grandi, pasobra awe mainta m'a mata sinku ju di pushi. Nan a kaba di nase i nan wow tabata será ainda. Ta bon mes ku nan wow tabata será, sino nan lo a mira kiko mi a hasi ku nan. Un m'a horka ku mi lensu, un m'a hoga den un hember di awa, un ma klaba dos klabu den su wowonan será, un m'a feita tur su lananan i despwes serélé den fréshidér. E di sinku m'a hinka un sigaria sendé den su boka, pero e no a muri. E ora ei m'a dal'e ku hilchi di mi sapatu riba su nanishi. El a keda sapatiá poko, pero a la fin tog el a muri.

Di repente mi ta sinti gana di jora i mi ta disidi na dal un kansion:

‘Ku tres sigaria den mi boka firkant
Ku un mucha ku ta hole bleekpoeder
Ku saku di suku kabes abow
I mi pianan den lodo...’

I una bes mi ta kanta, lagami sigi kanta antó. Lélélé.... lélélé... M'a mata sinku ju di pushi i tog mada no a kambia. Tur kos a keda meskos; e polis ta bibu ainda, e dos muhénan ku ta papia riba matamentu ta bibu ainda, a kachó, e muhé ku ta toka

[p. 41]

tambu den misa, e homber ku a ferf e borchi ta taha pa huma, nan tur ta bibu ainda.

Asta mi mes ta bibu ainda. Pero esta fuma mi ta awe nochi!

December 1949