Het Antwerps liedboek. Deel 1. Teksteditie

[p. 428]

191 Een nyeu liedeken

[Commentaar]

1
Hoort toe, ghi slootmakers al tesamen,
Al die met vijlen sloten wilt ontdoen!
Ghi sout u ooc met rechten scamen,
Dat ghi daervoren maect twee scoen
En secht al: ‘Noyt gheen beter spel
Dan: “Vijlt mijn slootken, tgaet so wel!”’

2
Een jonge maecht die quam mi clagen,
Hoe dat haer slot gesloten was;
En si haddet lange also gedragen,
Want si en vant gheen slotel op dat pas:
‘En al ben ic een luttel fel:
Comt, vijlt mijn slootken, tgaet so wel!’

3
Den ruyter stac zijn vijle al binnen den slote,
Hi dede noch naer hueren rel.
Dat vrouken sprac: ‘Beneder mote,
Daer sult ghi bluschen mijn geswel.
Noyt en haddic beter spel:
Vijlt mijn slotken, tgaet so wel!’

4
Dat vrouken sprac tegen den slotmaker:
‘Ghi moet mijn slotken maken veij.’
Ic goeter smout in, wel een aker,
Mijn hooft bedeech mi also keij!
Noit en had ic arger spel
Dan: ‘Vijlt mijn slotken, tgaet so wel!’

5
Dat vrouken dede huer slootken wel so vijle
Dat si zijn vijle al heel bedarf.
En ooc daernaer, in corter wijlen,
Den ruyter van vijlen starf:
‘En noit en had ic sulc gequel
Dan: “Vijlt mijn slootken, tgaet so wel!”’

6
Dat slot was eenen cleynen tijt ontslooten,
Maer varinc wast weeder toe.
Theeft die sloetmaker so verdroten,
Sy wouder mede uut hueren ghoe!
Noit en had ic arger vel
Dan: ‘Vijlt mijn sloetken, tgaet so wel!’

7
This schande voor de slootmakers,
Omdat si alle waren moe;
Men vint noch spitters ende brakers,
Si soudent doen met heeten bloe
En segghen: ‘Noit geen beter spel
Dan: “Vijlt mijn sloetken, tgaet so wel!”’

8
Wi bidden elc, nemet in dancke.
Mer wil iemant tslootken noch ontdoen,
Hi sal wel crijgen een goe blancke
Om te coopen een paer scoen!
En singt dan: ‘Noit beter spel
Dan: “Vijlt mijn slootken, tgaet so wel!”’