Het Antwerps liedboek. Deel 1. Teksteditie

[p. 282]

melodie Fruytiers 1565, nr. 26

[p. 283]

123 Van proper Janneken

[Commentaar]

1
Om een die liefste, die ic beminne
Moet ic daechs voor haer duere staen.
Si is so amoreus van sinne,
Het sal mi aen mijn leven gaen,
Si cost mijn herte so menigen traen!
Adieu schoon Janneken, tot op een wederkeeren,
Adieu, ic vare na tRoomsce lant.

2
Schoon soete lief, waert u bequame
Dat ghi mi gaeft een troostelijc woort,
Ic en soude certeyn geen ander boelken kiesen,
Al sout mi oock aen mijn leven gaen.
Helpt mi, Maria, minen druc verslaen,
Ick hebbe verloren mijn beste pant.
Adieu schoon Janneken, tot op een wederkeeren,
Adieu, ic vare na tRoomsche lant.

3
Dese nijders tongen gaen voor mijn ooghen
Ende achter minnen rugghe stroyen si quaet,
Si doen mijn jonghe juecht verdrooghen,
Dat sal ooc aen mijn leven gaen.
Het cost mijn herteken so menighen traen,
Hier ende elders, aen elcken cant.
Adieu schoon Janneken, tot op een wederkeeren,
Adieu, ic vare na tRoomsche lant.

4
Princersselijc lief, hoe moechdi mi vergheten?
Ende ic was altijt so ghereet.
Ende dat ghi mi dus wilt versteken,
Dat valt mijn herteken al te wreet.
Mijn lijf, mijn goet was voor u bereet
Want ic noeyt schoonder lief en vant.
Adieu schoon Janneken, tot op een wederkeeren,
Adieu, ick vare na tRoomsche lant.