Antwerps liedboek

167 Vanden Coninck van Castilien

1
WIe wil hooren singhen
een druckelijc nieu liet
Van die coninc van Castilien
Hoe dat hi wten lande schiet.

2
Trompetten ende claroenen |
dede hi so seere slaen
dat si alle souden comen
die met hem wilden gaen.

3
Als si opt water quamen
daer geschieden iammer groot
die scepen vlogen van malcander
si waren alle in grooter noot

4
Die coninc sprac Ioanna.
Wel edel vrouwe mijn
dit is bi uwen schulden
dat wi in desen noode zijn.

5
Die coninc totten stierman sprac
wel edel stierman fijn
Nv brenget mi weder te lande.
mi en roect niet waer wij zijn

6
Die stierman fijn totten coninc sprac
Wel edel heere mijn
Ic en can v niet te lande gebrenghen
Ic en weet niet waer wi zijn. |

7
Die coninc viel ootmoedelijc
Op beyde zijn knien
Hi badt gode van hemelrijck
dat hem gracie mocht geschien

8
Die stierman totten coninck sprac
Wel edel here mijn
Mi dunct ic hoore die vogelen singhen
Ic hope het sal wel zijn

9
Doen si in Engelant quamen
Men hiet hem willecoem zijn
Men scanc hem daer te drincken
den alder besten wijn

10
Van daer so gingen si seylen
Al na dat spaensche lant
Tot zijnder edelder vrouwen
Al in behoudender hant.