Antwerps liedboek

(2001)–Anoniem Antwerps liedboek– rechtenstatus


162 Een nyeu liedeken. 1 WIe wil hooren een goet nieu liet En dat sal ic ons singhen mer dat te wittenberch is geschiet Van also vreemde dinghen 2 Daer ghingen twee gespeelken goet So verre aen gheen groen heyde \| die een die voerde eenen huebscen moet die ander weende seere 3 Ghespele wel lieue ghespeelken goet Waer om weende ghi so seere Mer weent ghi om ws vaders goet Oft weent ghi om v eere 4 Ic en ween niet om mijns vaders goet. Ick en ween niet om mijn eere Wi twee wi hebben eenen lantsknecht lief Rijck god wie sal hem werden 5 Ghespele wel lieue ghespele goet Laet mi den lantsknecht alleene Ick sal v mijnen broeder gheuen Mijns vaders goet een deele 6 Och dijnen broeder en wil ic niet Noch dijns vaders goet een deele Ic hebbe veel lieuer mijn soete lief Dan siluer oft root gulden 7 En neme ick dan die rijcke So truert die suyuerlijcke
[Folio 90r]
die rijcke wil ic laten varen Ende nemen die suyuerlijcke 8 Een luttel goets is haest verteert dan heeft die liefde een eynde dan zijn wi twee noch ionc ende sterck Meer goets mach ons ghewerden 9 Hi nam dat maechdeken bider hant Bi haer snee witte handen Hi voerdese door dat groene wout dat groene wout ten eynde 10 Daer vonden si twee een bedde Van peerlen ende van siden Adieu adieu mijn soete lief Het gaet sich aen een scheyden 11 Maer die dit liedeken eerstwerf sanck Hi heuet wel ghesonghen Hi heuet alle vroukens lief God scheynde die verraders tonghen