Antwerps liedboek

150 Een oudt liedeken.

1
TGhepeys leyt mi seer vast en quelt
Van mi en can icx niet gheweeren
Mijn sinnen zijn mi so seer ontstelt
Want troost van haer moet ic ontbeeren.
Ten coemt niet al na mijn begheeren
Want niet en baet wat ick labuere
Aldus moet ic mijn bloet verteeren
Ic ben daer in ick moet daer duere

2
Reyn gonste moet ick tot haer draghen
Die nv so dick verwandelt mijn bloet

[fol. 83r]

 

Mocht ic haer noch eens mijn lijden clagen.

 

Mijn herte ontlasten dat waer mi goet

 

Nv moet ick deruen haer vrientschap soet

 

Gheen slodt en can ic geschieten daer vore

 

Dwelc mi bedroeft herte sin ende moet

 

Ic ben daer in ic moeter duere

 

 

 

3

 

Och lacen ic en weet niet waert mi ledt.

 

Dat si mi schout die waerde reyn

 

dat is een plaet dat mi besmet

 

Want ick gheen troost aen haer en vinde

 

Lijde ick verdriet ende groot alleynde

 

Ick en vinde nerghens gheen auontuere

 

Mer ic hope het sal noch beteren ten eynde

 

Ic ben daer in ick moet daer duere

 

 

 

4

 

Die nijders tongen hebbent gebrouwen

 

Dat ic van haer ben ghedreuen

 

Op haer stont alle mijn betrouwen

 

Mer si heeft mi altemael begheuen

 

Ic en derf niet meer op hope staen

 

Want si maect mi dat leuen te suere |

 

Ten baet nyet alle mijn suchten ende beuen

 

O lacen ick ben daer in ic moet daer duere

 

 

 

5

 

Ter eeren van alle schoone ioncfrouwen.

 

Die geerne in Venus armen ligghen

 

So hebbe ick nv dit liet ghesongen

 

Dat daer elck af mach smaken

 

Niemant en derf daer na seer haken

 

Dat soete verwandelt so dick int suere.

 

Elck wachte hem voor vrou Venus saken

 

Ick ben daer in ic moet daer duere.