Antwerps liedboek

(2001)–Anoniem Antwerps liedboek– rechtenstatus


142 Een oudt liedeken 1 RIic god wie sal ic clagen \| dat heymelijc lijden mijn Mijn boel is mi veriaghet Scheyden is mi geworden pijn Mijn boel is mi veriaget Sceyden is mi geworden cont dus draue ic ouer geen heyde mijn herte is mi seer gewont 2 Hi badt mi so minlijcke Met witten armen blanck dat ic bi hem woude bliuen Die somer en is niet lanck Ic en mach bi v niet bliuen. Ick en mach bi v niet zijn Ick wil ouer geen groen heide Tot die alder liefste mijn 3 Moet ic nv van haer sceyden dat doet mijnder herten so wee dus vaertse ouer gheen heiden Tot dat icse wederomme sie Adieu mijn alderliefste
[Folio 79r]
mijn herte blijft mi doorwont Ick en mach altijt bi v niet wesen Blijft ghi nv doch altijt ghesont 4 Een bitter cruyt is scheyden Dat proeue ic wel nv ter tijt Wie noyt van zijn liefken en scheyde Hi en weet van gheender pijn Mijn liefken vaert ouer gheen heyde Ic en mach bi haer niet zijn Adieu mijn alderliefste Het moet nv gescheyden zijn.