Antwerps liedboek

125 Van die coninghinne van Denemercken

1
O Radt van auontueren
Hoe wonderlijck draeyt v spille
Den eenen moet ongeluc gebueren
Die ander heeft so wel sinen wille
Van die coninghinne van Denemercke
Ysabeele dat vrouwelijc graen
Die clachte die si dede
God verleene haer die eewige vrede
Dat suldi hier na verstaen

2
O coninck van Denemercken
Mijn man mijn here reyn.
God wil v in duechden stercken
Ende alle mijn kinderkens cleyn
Nv moet ic van v scheyden
Ende laten v in eenen soberen staet
God willet hem vergheuen
Die ons dus hebben verdreuen
Oft daer toe gaf den eersten raet

3
Mijn broeders zijn verheuen
Ende mijn susters in staten groot
Eylaes wi zijn verdreuen
Ende liggen hier in | groote noot
O heeren ende Prelaten
Diemen hier al met ooghen aensiet
Coemt doch alle mijn kinderkens te baten
dat icse nv moet laten
dat is mi een groot verdriet

4
Die Coninc sprac met weenenden ooghen
Och edel vrouwe en zijt niet versaecht
Hoe salt mijn herte ghedoghen
dat ghi dus deerlijc claecht.
die kinderen sullen wel op gheraken
Den Keyser wort haer onderstant
Ic hope ick salt so maken
Gods gracie sal met mi waken
dat ick sal comen in mijn lant

5
Adieu vrou Ianne lieue moeder
God behoede v voor teghenspoet
Ende v Kaerle lieue broeder
Dat edel Keyserlijc bloet
Hadde ic tegen u moghen spreken
Mer ic moet steruen die doot
Ende claghen v mijnen ghebreken

[fol. 71r]

 

Dat mijn kinderen niet en worden versteken

 

So en ware mi gheen steruens noot

 

 

 

6

 

Adieu hertoghe van Oostenrijcke

 

Donfernandus broeder goet

 

Ende Leonora dier ghelijcke

 

God behoede v voor teghenspoet

 

Ende Katherijne suster reyne

 

Die ic noyt en hebbe gesien

 

Adieu mijn kinderkens cleine

 

Adieu mijn vrienden alle ghemeyne

 

Adieu mijn man coninclijck engyen

 

 

 

7

 

Dit heeft die coninghinne ghesproken

 

Te Swijnaerde alst is bekent

 

Daer haer herte is ghebroken

 

Den Coninck daer zijnde present

 

den .xix. Ianuario tghewaghen

 

CCCCC.XXV. beleuen

 

Hi machse wel beclaghen

 

Ende in zijn herte draghen

 

Also langhe als hi mach leuen