Antwerps liedboek

80 Een nyeu liedeken

1
HEt ghinghen drie gespeelkens goet
Spaceeren in dat wout
Si waren alle drie beruoet
den haghel ende snee was cout

2
Die een die weende seere
die ander hadde huebschen moet
die derde begonste te vraghen.
Wat heymelijck boelschap doet

3
Wat hebt ghi mi te vraghen
Wat heymelijck boelschap doet
Het hebben drie ruytersche knechten
Gheslaghen mijn lief ter doot

4
Hebben drie ruytersche knechten.
Gheslaghen v lief ter doot
Een ander boel sult ghi kiesen
Ende draghen huebschen moet |

5
Soude ick een ander boel kiesen
Dat doet mijnder herten so wee.
Adieu mijn vader ende moeder
Ghi en siet mi nemmermeer

6
Adieu mijn vader ende moeder
Ende mijn ioncste susterkijn
Ick wil gaen ter linden groene
daer leyt die alder liefste mijn

7
Die dit liedeken dichte
Dat was een ruyter fijn
Sinen buydel was seer lichte
daer om drinct hi selden wijn