Antwerps liedboek

71 Vanden visscher.

1
HEt voer een visscher visschen |
So verre aen ghenen rijn
Hi en vant daer niet te visschen
Dan een huebsch maechdelijn

2
Och visscher seyde si visscher
Waer toe dracht ghi uwen moet
Al totter huebscher deerne
Dat dunct mi wesen goet

3
Och visscher seyt si visscher
Dat visch hebt ghi gheuaen
So verre aen geen groen heyde
Daer ist goet visschen gaen

4
Aen gheender groender heyde.
Daer leyt dien couden snee
Daer vriesen mi handen ende voeten
Mijn hooft doet mi so wee

5
Vriesen v handen ende voeten
Doet v hooft so wee
So gaet al inder stouen
daer en vrieset nemmermeer.

6
Mer doen die loose visscher

[fol. 42v]

 

Al inder stouen quam

 

Doen bestont hi haer te vragen

 

Na haren getrouden man

 

 

 

7

 

Wat hebt ghi mi te vragen.

 

Na mijnen getrouden man

 

Mijn man is al inder kercken

 

Hi bidt gods heylighen an.

 

 

 

8

 

Is v man al inder kercken.

 

Oft inden coelen wijn

 

So laet ons eten ende drincken

 

Ende laet ons vrolijck zijn

 

 

 

9

 

Mer doen si saten ende aten

 

Doen quam haer eygen man

 

Doen docht die loose visscher

 

hoe come ick nv van dan.

 

 

 

10

 

Dat vrouken was behendich

 

Si goot haer vischsop wt

 

doen spranc die loose visscher

 

Ter hoochster veynsteren wt