Antwerps liedboek

(2001)–Anoniem Antwerps liedboek– rechtenstatus


58 Een out liedeken. 1 HEt quamen drie ruyters geloopen. So verre int duytsche lant Met netten ende met knoopen ia knoopen. Het waren die beste diemen vant 2 Si quamen voor eender waerdinnen huys Al daermen tapte den wijn Waerdinne wi droncken so gaerne ia gaerne. Wi en hebben gheen gheldekijn 3 Waer op soude ick v borghen Ghi coemt wt vreemde landen V cleederkens die zijn dinne ia dinne Ghi en hebbet ghelt noch panden 4 Doen sprack dat ionckwijf vanden huys Nv tappet den ruyters den wijn
[Folio 35r]
Al dat si verteeren ia teeren daer sal ick v boorghe voor zijn 5 Doen sprac die vrouwe vanden huys En spreket niet so bout Si souden v helpen verteeren ia teeren V siluer ende oock v gout 6 Doen sprac dat ionck wijf vanden huys Ic woude die ioncste ruyter waere mijn Ende icker mede soude gaen wandelen ia wandelen Van Straesborch tot op den rijn 7 Die ioncste ruyter tooch wt zijn net Ende worpt inder maghet schoot daer stont die edel ruyter ia ruyter. In een wambeys van goude root