Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 28r]
| |
Waer sal ick mi onthouwen
Mijn herte wert geheel desperaet
Dat ick nv Brugghe moet laten
Die schone stede soet
Rijck god coemt mi te baten
Mijn herte verbrant al inden gloet
O lieffelijck lief
door v schoon aenschijn soet
Dat mach ick wel beclaghen
dat ick v nv laten moet.
2
Wat sullen wi nv gaen beghinnen
Wi ghildekens al ghemeyn
Si woont te Brugghe binnen
dat alder waertste greyn
Si heeft mi nv begheuen
Ende ghelaten inden noot
Och bouen alle die ter werelt leuen
So sterue ick ia die doot.
O lieffelijck lief. etcetera.
3
Dat ick oyt was gheboren |
Van moeder lijf ontfinck.
daer om so moet ick tueren
Het is mi een droeuich dinck
Vrou Venus wat condi maken
Ick en weets mi gheenen raet
Het zijn vreemde saken
die ghi nv aen gaet
O lieffelijc lief.
Door v schoon aenschijn. etcetera.
4
Dit liedeken is eerst ghesongen
Te Brugghe al op die steen
In spijte van alle nijders tonghen.
Ter eeren van vroukens reyn
Een Mechelaer heuet geschreuen
daer hi lach in der noot.
Nv moet hi haer begheuen
dat sal hem doen den doot
O lieffelick lief.
door v schoon aenschijn soet
Dat mach ick wel beclaghen
dat ick v nv laten moet.
|
|