Antwerps liedboek

45 Een oudt liedeken.

1
EEn ridder ende een meysken ionck
Op een riuierken dat si satten

[fol. 25v]

 

Hoe stille dat dat water stont

 

Als si van goeder minnen spraken

 

 

 

2

 

Och segt mi stout ridder goet

 

Ick soude gaerne weten

 

Waer om dat dat water stille stoet

 

Als wi van goeder minnen spreken

 

 

 

3

 

Dat dat water stille staet.

 

dat en gheeft mi gheen vreemde

 

Ick hebbe so menighe ionghe maecht

 

Ghebrocht in groot allende

 

 

 

4

 

Hebdy so menighe maecht

 

Ghebrocht in swaer allende

 

Wacht v stout ruyter goet

 

dat v God niet en scheynde.

 

 

 

5

 

Ick weet noch een so hooghen berch

 

Boouen alle berghen is hi hooghe

 

die sal ick noch in dale brenghen

 

daer om ist dat ick pooghe

 

 

 

6

 

Suldy mijns vaders hooghen berch

 

Tot eenen dale brenghen |

 

Ick sage v lieuer stout ridder goet

 

Bi uwer keelen hanghen

 

 

 

7

 

Ick hadde noch veel lieuer

 

dat v die sonne bescheene

 

Al onder thol van uwen voeten

 

den bast al om v kele

 

 

 

8

 

Dat meysken was ionc ende daer toe dom

 

Si en wist niet wat si seyde

 

doen si in haers liefs armen lach

 

doen was den berch ter neder.

 

 

 

9

 

Och segt mi meysken ionck.

 

Is nv mijn kele gehanghen

 

Nv is dijns vaders hooghen berch.

 

In eenen dale gheuallen

 

 

 

10

 

Och doen dat meysken ghewaer wert

 

dat si een kindeken bleef draghen

 

Si ghinck al voor den ridder staen

 

Si badt hem om ghenade

 

 

 

11

 

Ghenade stout ridder fijn

 

Ghenade van mijnen lijue

[fol. 26r]

 

Ic was een goet maechdekijn

 

Nv moet ic met uwen kinde blijuen

 

 

 

12

 

Wat ghenade soude ic v doen

 

Ghi en zijt gheen keyserinne

 

Ick mocht v mijnen schiltknecht gheuen

 

Cost ic hem daer toe ghebringhen

 

 

 

13

 

Vwen schiltknecht en wil ic niet

 

Hi is mi veel te snode

 

Al is mijnen hooghen berch ter neder

 

Ic hope ghi sult hem noch wel hoghen

 

 

 

14

 

Dat meysken hadde eenen broeder stout

 

Hi was haer goet ende ghetrouwe

 

Als hi haer dede wel int aenschijn

 

Hi beweest haer al metter trouwen

 

 

 

15

 

Och doen die broeder gheware wert

 

Dat si een kindeken bleef draghen

 

Hi ghinc al voor den ridder staen.

 

Hi badt hem mede te graue

 

 

 

16

 

God groet v seyt hi stout ridder vrij.

 

Stout ridder vrij van waerden |

 

Och die met uwen kinde was beuaen

 

Die leyt hier doot opter aerden

 

 

 

17

 

Och is si doot dat schoone wijf

 

Die ouerschoone die ick beminne

 

So en sal ic nv noch nemmermeer

 

Mijn grauwe ros berijden

 

 

 

18

 

Haelt mijn spere ende ooc mijn schilde

 

Mijn swaert al aen mijn side

 

Ic wil gaen rijden seluer daer

 

Men vint der valscher boden so vele

 

 

 

19

 

Och doen hi op der heyden quam

 

Hi hoorde die clocken clincken.

 

Hi hoorde wel aen der clocken clanck

 

Dat si inder aerden moeste sincken

 

 

 

20

 

Hi nam sinen bruynen schilt

 

Hi worp hem op der aerden

 

Ligget daer ligget daer goet bruyne schilt

 

Van mi en suldi niet ghedragen werden

 

 

 

21

 

Heft op uwen bruynen schilt

 

Hanghet hem onder v side

[fol. 26v]

 

Al waer v vader ende moeder doot

 

Den rouwe moet ghi lijden

 

 

 

22

 

Al waer mijn vader ende moeder doot

 

Ende mijn broeders alle vijue

 

So en waer den rouwe niet also groot

 

Als hi is van desen schoonen wijue

 

 

 

23

 

Doen hi op dat kerchof quam

 

Hi hoorde die papen singhen

 

Hi hoorde wel aen der papen sanck

 

Dat si vigelie songhen

 

 

 

24

 

Doen hi inder kercken tradt

 

Hi sach zijn liefken staen in bare

 

Ghedect met een baren cleede

 

Recht oft si nv oock doot ware

 

 

 

25

 

Hi hief op dat baren cleet

 

Hi sach haer cleyn vingerken roeren

 

Och doen so loech haer roode monde

 

Doen si den ridder voelde

 

 

 

26

 

Staet op staet op mijn soete lief.

 

Wel ouer schoone ioncfrouwe |

 

Ic en sal v nv noch nemmermeer

 

Doen so groten ontrouwe.

 

 

 

27

 

Wel op wel op mijn soete lief

 

Mijn ouerschoone ioncfrouwe

 

Al waert mijn vader ende moeder leet

 

So sal ick v tot eenen wijue trouwen

 

 

 

28

 

Al waert mijn vader ende moeder leet

 

Ende mijn broeders alle vijue

 

So sal ick v houden voor mijn bruyt

 

Ende trouwen v tot eenen wijue