Antwerps liedboek

32 Een nyeu liedeken

1
DIe mey is so genoechlijcken tijt
Het spruyten gelu bloemkens aender heiden
Ic hebbe verloren alle mijn iolijt
Mijn gepeys is so menigherleyde
Ic en was nije van goeder herten vro vro vro
Van goeder herten also vro
Mi en waer leedt misquaem v yet

2
Sal ic langhe in druck moeten leuen
Schoon waerde lieueken ic ende ghy
Mi dunct dat mi alle aderen beuen
Ende mijn leden begeuen my
Ic en was nije van goeder herten vro. etcetera.
Van goeder herten also vro
Mi en waer leedt misquaem v yet

3
Siet op mi trousalich wijf
Suldijs mi nv ter noot af gaen
Herte moet sin ende daer toe lijf.
Sullen tot uwer ghenaden staen |
Ic en was nije van goeder herten vro. etcetera.
Van goeder herten also vro
Mi en waer leedt misquaem v yet

4
Staet mi in staden schoon lief
Om uwen wil draghe ick graeu ende grijs
Siet op mi en kendy my niet
Siet op mi so moechdijs worden wijs
Ic en was nije van goeder. etcetera.
Van goeder herten also vro
Mi en waer leedt misquaem v yet

5
Seuen iaer heb ick geploghen
Om te vercrijghen een ghestadich lief
Ick hebbe gheleghen in swaren tormenten
En suldy mijns ontfermen niet.
Ic en was nije van goeder herten. etcetera.
Van goeder herten also vro
Mi en waer leedt misquaem v yet

6
Ic siese hier gaen voor mijn ooghen
Och op mi en achtse niet
Och leyder qualijck can ict ghedooghen.

[fol. 19r]

 

Dat een ander heeft mijn lief

 

Ic en was nije. etcetera.

 

Van goeder. etcetera.

 

Mi en waer leet misquaem v yet