Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Ghelijck een Casteel, 'twelck staet gheheele.
TReuren, klaghen, suchten,
Peynsen en duchten
Die doen my in vruchten // tot dese stont,
Want een schoone Kerssouwe
Hout my heel in rouwe
Als ick haer aenschouwe // 'thert wert doorwont,
Mocht ick eens zijn // haer lief ghepresen,
Soo soude mijn pijn // haest zijn genesen,
Maer lacy ten sal nimmermeer wesen,
Wat ick spore // of orbore // t'gaet te gront,
Nochtans sal ick vierigh
| |
[pagina 70]
| |
In liefden manierigh
Haer zijn goedertierigh ghetrou met vlijt
Op hoop dat ick mach winnen
Haer hert en sinnen
Door mij stadigh minnen, niet sonder strijt,
Wesentlijck en soet, is sy rechtvaerdich,
Deughdelijck en goet
Daer toe meewaerdigh,
Och mocht ic eens zijn haer dienaer aerdigh
Ick sou leeren, vreught hanteeren, in dees tijt.
Als Venus certeyne
Suyver en reyne
Soo wort sy alleyne, van elck bespiet,
Woude haer ghedachten
Op mijn woorden achten
So waer al mijn jachten nu gantsch tot niet
En sonden voorwaer
Versamen spoedigh
Met reynde liefde klaer
En eendracht goedigh,
Woude sy dit volbrenghen ootmoedigh
Ick sou rusten, haer met lusten, prijsen siet,
Om des Princes schoone
Moet ick arm persoone
Leven ongewoone, in anghst en noot,
Woude sy verheven
My haren troost geven
Ick sou vrolijck leven, sonder aenstoot,
Dus Cupido jent, aensiet mijn swichten
Doorwort haer present, met uwe schichten,
Soo sal haer gonst mijn smert verlichten,
En sal groeyen, in liefd' bloeyen, totter doot.
|
|