Amoreuse liedekens

Een nieu Iaer Liedt.
[Met vreught, en deucht, schoon Lief ghepresen]

[p. 60]

 

MEt vreught, en deught, schoon Lief ghepresen

 

Bemin ick u voorwaer, Bemin, &c.

 

Vreught, verheught, en kan ghenesen

 

Mijn bitter lijden swaer, Mijn bitter, &c.

 

Sonder u Lief eerbaer

 

Is my 't leven een sterven,

 

Dus laet, ick raet, van u verwerven, &c.

 

Deur praet, tot baet, in desen nieuwen Iaer.

 

Al eer, 'thert teer, u oyt jonst gonde

 

Schoot Venus in my klaer, schoot, &c.

 

'tBegeer, soo seer, tot dat ick vonde

 

V minnelijck wesen daer, u minnelijck, &c.

 

Ick nu aen vind' geen maer,

 

Soo dat ick u moet minnen

 

Laet 't hert, verwert, nu troost ghewinnen,

 

Mijn smert, drijft vert, in desen nieuwen Iaer.

 

Reyn vrou, mijn rou, en sal niet enden

 

Voor dat ick gantsch en gaer, voor, &c.

 

Ghetrou, aenschou, dat ghy gaet senden

 

Troost tegens mijn ghevaer, troost, &c.

 

Want ick gheen moet en spaer,

 

Deughtsame vrou verheven,

 

Dat ghy, seer bly, u sout begeven, &c.

 

Tot my, heel vry, in desen nieuwen Iaer.

 

Ionst biet, 'tverdriet, Princes sal keeren

 

Weer van u trou dienaer, weer van, &c.

 

Iae 't Liet, gheschiet, tot uwer eeren,

 

Lieft my nu voor een aer, lieft my, &c.

 

Laet ons worden een paer,

 

En wilt qua klappers snoeyen,

 

Met vlijt, verblijt, laet liefde bloeyen,

 

Subijt, wient spijt, in desen nieuwen Iaer.