Amoreuse liedekens

Een nieu Liedeken,
[Verblijt, met vlijt, in dese Meye tijt]

Op de wijse: Verheught in deught.

VErblijt, met vlijt, in dese Meye tijt,
En spoet int groen, En, &c.
Vermijt, en slijt, die vilony in spijt
Reyn liefde wilt bevroen, Reyn &c.
Haest u int velt seer koen, om de mey te voen
In vriendelijckheydt vergaert, doch met u Liefken paert,
Bedaert eer ghy beswaert
Verklaert u aert, en liefd' by u bewaert
In dese Mey vermaert, In dese Mey &c.

Int velt u stelt met droefheyt u niet quelt

Maer vreught doch aenvaert, &c.
Druc smelt met gewelt, weest vrolijck als een helt
Toont liefde onbeswaert, &c.
V liefste lief openbaert, so wert u liefste verklaert
Dan suldy troost ontfaen, als ghy doet sulck vermaen
Tot die u hert heeft bevaen,
Dees paen wilt gaen, met vreugt wilt nemen
aen, Dees Mey seer soet ontdaen, &c.

In deught verheught, met u Lief als ghy meught

[p. 56]

 

Int Wout seer schoon gheplant, &c.

 

En vreught, geneught, lieflijk als jonge jeugt

 

Neemt vrolijckheyt ter hant &c.

 

Spoedt u vaerdich int lant

 

Daer de vogelkens triumphant

 

Singen met stemmen veel, en prijsen met luyder keel

 

Ghelijck die boven al is eel

 

Quarteel, 't ghescheel doet van onse toneel

 

Soo valter geen kraeckeel, &c.

 

 

 

Prince.

 

Prins tracht met macht, na haer die u verwacht

 

In liefd' bloeyende soet,

 

V klacht versacht, haestigh rijt op de jacht

 

Tot dat ghy haer ontmoet, &c.

 

Toont haer u liefd' met spoet

 

Als een recht minnaer doet

 

Die tot haer liefd' draecht, en haer geern behaecht,

 

niet saecht, te komen by de maecht,

 

Maer waecht en vraecht, weest wech eer dat

 

het daecht, dat ghy u niet beklaecht.