Amoreuse liedekens

Een nieu Liedeken,
[Dewijl wy aldus stille staen]

Op de wijse: Daer is een Leeuwerick doot gevallen.

DEwijl wy aldus stille staen
Woud' ick wel vreught voortbringhen,
Cond' ick als ghy wel hebt ghedaen
Soo lustelijcken singhen,
En danssen als een proper dier
Twee treetjens fier // in een sausier,
Hoe lustelijck wou ick springhen.

Ick sie een meysjen voor my gaen

Sy is soo jonck van Iaren,
Moght ick in haer behaghen staen
Geen moeyten soud' ick sparen
Soo soud' ick armen slechte bloet

[p. 20]

 

Met der spoet // Mijn Poppe goet

 

Met haer willen vergaren.

 

Ick en ben niet schoon noch rijck van goet

 

Noch wil gaen ter keuren,

 

Doch mach ick arme slechte bloet

 

Mijn Liefken niet gebeuren,

 

Als ick dit proper meysken jent

 

Excellent, ben ontrent

 

Soo wijst sy my de deure.

 

Princesse ist niet een groot verdriet

 

Dat ick u dus seer nae jage

 

't Geen dat my mach gebeuren niet

 

Is altijt mijn behagen,

 

Dus sorgh ick, 'tleyt my om mijn leen

 

Ick aen mijn been, een blaeuwe scheen

 

Ter eeren van haer sal draghen.