Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Bedroefde herteken.
MYn Oochskens weenen,
Mijn Hert moet suchten,
Dus moet ick clagen mijn verdriet,
Mijn liefste Lieveken wil van mijn vluchten
Wist ick waerom ick en treurde niet.
Wist ick waerom 'twaer mijn begeeren
Dat sy op my dus is verstoort,
Sy gheloofde qua tonghen
| |
[pagina 100]
| |
Het mach my wel deeren
Die niet en soecken dat discoort.
Ick bemin haer seere en sy my mede
Ter Werelt en was noyt liever paer,
Wy en hadden noyt twist
Maer altijdt vrede
Och bitter scheyden ghy valt my zwaer.
In vreemde Landen moet ic gaen reysen
Met groote droefheyt dolen altijdt,
Sult ghy schoon lief daer niet eens om peynsen
Dat ghy daer af een oorsaeck zijt.
Reale mondeken wilt ghy my verlaten
Soo moet verdwijn mijns hertsen bloet,
Wilt ghy u Lieveken
Niet comen te baten,
Noyt meerder droefheyt en teghenspoet.
Had ick den Appel van rooder Goude,
Die Paris Venus schonck voor een present,
Ick schonckse mijn Lieveken die schoonste Vrouwe
Die daer oyt was onder 'sHemels tent.
Bedroeft mach ick wel zijn van sinnen
Beclaghen mach ick wel mijn misval,
Die ick met mijnder Herten beminne,
Dat daer een ander by rusten sal.
Hoe sullen mijn oochskens dat aenschouwen,
Wat grooter droefheyt sal mijn hert ontfaen
Als daer een ander mijn lief sal trouwen
En met haer sal uyt vermeyen gaen.
Hoe can sy my dus vergeten
Daer wy malcanderen soo hebben ge-eert,
Ic mach wel seggen dat vrouwen gedachten
Wanckelbaer zijn en haest verkeert.
Mocht ic u lieveken noch selver eens spreken
Dat ghy mocht hooren mijn claghen groot,
Mijn jonck herteken sal moeten breken
Dat ghy u lieveken dit lyden aen doet.
Ick bid u lieveken met smeeckender tranen
V Oochgkens wilt op my slaen,
Den dou der liefden
Laet op my dalen
Ick sal my beteren lief heb ick misdaen,
Nu is mijn arbeyt doch al verloooren,
Mijn singhen, mijn springen, nacht en dach
Sy heeft een ander lief uytvercooren,
Daer ick my luttel op hadde ghewacht.
| |
[pagina 101]
| |
Op hoope moet ick nu gaen leven
Ick ben eylaes een onwaert gast,
Al wast my van te vooren gheschreven
Ick betroude haer woordekens veel te vast.
Adieu Princesse uytvercooren
Adieu die schoonste die Liefste mijn,
Het is my een droevich dinck om te hooren
Dat wy twee ghescheyden moeten zijn.
|
|