Amoreuse liedekens

Een oudt Liedeken.
[Ieucht en deucht mijn hert verheucht]

IEucht en deucht mijn hert verheucht
Altijt soo moet ick treuren,
Troost my schoon Lief also ghy meucht,
Laet my eens troost ghebeuren,
Schoon Lief u klaer aenschijn
Verheught dat herte mijn,
Liefde te draghen en is geen pijn
Als liefde met liefde geloont mach zijn.

Peynsen, hopen, suchten en treuren

Heeft mijn hert bevanghen,
Mach my geen troost van haer ghebeuren,
Nae haer staet mijn verlanghen,
Voor haer en koos ick geen goet,
Dat doet haer edel bloet,
Liefde te draghen en is geen pijn,
Als liefd' met liefd' geloont mach zijn.

Mocht ickse aensien tot aller tijdt

Soo waer ick gantsch ghenesen,
Haer wesen dunckt my een jolijt
Sy wert van my ghepresen,
Haer lijf staet alsoo net
Wtter maten wel gheset,
Liefd' te dragen en is geen pijn,
Als liefd' met liefd' geloont mach zijn.

Prince.

Oorlof Princesse fier,

Mijn hert laet ick u te pande,
Weest my doch ghenadelijck hier
Als ick ben uytten Lande,
Schoon Lief als ick peyns om dijn,
Soo verheught dat herte mijn,
Liefde te draghen en is geen pijn
Als liefd' met liefd' geloont mach zijn.