Amoreuse liedekens

Een oudt Liedeken.
[Ick sie die morghen-sterre]

ICk sie die morghen-sterre
Mijn Liefkens klaer aenschijn,
Men salse wecken met sanghe
De Alderliefste mijn.

Wie ist die daer singhet

Ende mijn niet slapen en laet,
Hy sal sijn singhen laten
Voorwaer segge ick hem dat.

Dat ben ick Ridder koene

Een Ridder wel ghemeyt,
Wanneer suldijs my loonen
Alle mijn sanges arbeyt.

Comt noch tavont spade

Al voor mijns Vaders Hof,
Aldaer sal ick u loonen
En seght daer niemant of.

Den dagh die nam een eynde,

Die Iongelinck quam aldaer,
Met sijne blancke Armen
Woude hyse omme vaen.

Nu staet Ionckheer stille,

En rijt my niet nae,
Ick moet eerst weten
Wat loon ick soude ontfaen.

Bergen en Lant schoone Ionckvrouwe

Sal u vry eyghen zijn,
Ende Boven al die leven
Suldy de Alderliefste zijn.

Sal ick boven alle Ionckvrouwen

V Alderliefste zijn,
Soo suldy Ridder koene
Mijns Lijfs gheweldigh zijn.

Sy namen daer malkanderen

Sy gingen eenen ganck,
Al onder een Lindeken groene
De Nachtegael daer op sanck.

Hy liet zijn mantel glijden

Beneden in dat gras,
Om dat sijn vergulde sporen
Vanden douwe niet souden worden nat.

Daer laghen sy twee verborghen

Den lieven langen nacht,
Vanden avont tot den morghen,
Tot dat scheen den lichten dagh.