Amoreuse liedekens

(na 1613)–Anoniem Amoreuse liedekens– rechtenstatus



[pagina 71]
[En ben ick niet in grooter noot] En ben ick niet in grooter noot, Sy heeft mijn hooft in haren schoot Begreepen // dat block dat moet ick slepen. Haer handekens wit haer Vingherkens broos, My dochte sy waer my veel te loos Doen ickse laestmael aenschoude, Sy toonde my een soo lieflijcken voys, Doen ickse tot mijnen soete liefken koos, Met lusten // och lief mocht ick by u rusten. Dus scheyde ick hier niet van daen Een troostelijck woort wil ick ontfaen, Al soudt ghy my ontlijven, Ick laete om u soo menigen traen, Over mijn root-bloeyende wanghen gaen Mijn rouwe // wel edel schoon jonckvrouwe. Vrou Venus weset my ghetrou, Besprenght my met uwen coelen dou, Mijn branden al mijn leden, Snijt in twee dat minnen tou, Ick hebbet ghedraghen op mijnen mou, So suere // dat block wil ick verschuere. O lief doet my doch eenich gerief, En schrijfdet my noch eene Minne-brief Als ick van u moet scheyden, Want ghy berooft my mijn sinnekens vijf, Daer toe hebt ghy mijn jonge lijf Bedorven, och lief waer ick al gestorven.